म. टा वृत्तसेवा, ठाणे
नौपाड्यात शनिवारी सकाळी सुरेश ठिकरूळ (५९ रा. ऐरोली) यांना दोघा भामट्यांनी बोलण्यात गुंतवून त्यांच्याकडील सोन्याचे दागिने आणि रोख रक्कम आदी मुद्देमाल लांबवल्याची घटना घडली. या दोघा भामट्यांविरुद्ध नौपाडा पोलिस ठाण्यात गुन्हा दाखल करण्यात आला आहे.
ठिकरुळ हे आईच्या घरी पायी निघाले होते. त्यावेळी भामटे त्यांच्याजवळ आले आणि डोळ्यांचा दवाखाना कोठे आहे, अशी त्यांच्याकडे विचारणा केली. तसेच, तुमच्याकडील सर्व दागिने आणि इतर वस्तू रुमालात काढून ठेवा, असेही भामट्यांनी सांगितले. अशा पद्धतीने भामट्यांनी ठिकरूळ यांच्याकडील रोख रक्कम आणि सोन्याचे दागिने असा एकूण एक लाख ३९ हजार रुपयांचा मुद्देमाल फसवणूक करून लंपास केला आहे. आरोपी ४० ते ४५ वर्षे वयोगटातील असून नौपाडा पोलिसांनी आरोपीचा शोध सुरू केला आहे.