दिव्यांग प्रवाशाला जाळण्याचा प्रयत्न, अल्पवयीन गर्दुल्ला ताब्यात, धक्कादायक कारण समोर

कल्पेश गोरडे, ठाणे : धावत्या लोकलमध्ये दिव्यांग प्रवाशाला जाळण्याचा प्रयत्न करणाऱ्या गर्दुल्ल्याला बेड्या ठोकण्यात रेल्वे पोलिसांना यश आले आहे. जीवघेणा हल्ला करणारा हा गर्दुल्ला अल्पवयीन असून स्वतः दिव्यांग आहे. रेल्वे पोलिसांनी त्याला ताब्यात घेऊन चौकशी केली असता त्याच्यावर या आधी देखील मोबाईल चोरी सारखे गुन्हे दाखल असल्याची माहिती तपासात समोर आली आहे.

घटना अशी की, ठाण्यातील दिवा येथे राहणारे ३५ वर्षीय प्रमोद वाडेकर हे लोकलने प्रवास करत आपल्या घरी परतत होते. यावेळी शनिवारी रात्री मुंब्रा स्थानकाच्या जवळ एका गर्दुल्ल्याने त्यांच्या अंगावर पेटता कपडा टाकून जाळण्याचा प्रयत्न केल्याचा धक्कादायक प्रकार घडला. या प्रकारामुळे प्रमोद यांच्या डाव्या हाताला गंभीर दुखापत झाली असून पूर्ण हा होरपळून निघाला आहे. तर आग विझवत असताना त्यांचा उजवा हात देखील भाजला आहे.

या घटनेची माहिती लोहमार्ग पोलिसांना प्राप्त होताच त्यांनी घटनास्थळी धाव घेतली. प्रमोद यांना कळवा येथील छत्रपती शिवाजी महाराज रुग्णालयात उपचारासाठी घेऊन जाण्यात आले. मात्र या ठिकाणी बेड उपलब्ध नसल्याने प्रमोद यांच्यावर प्राथमिक उपचार करून त्यांना पुढील उपचारासाठी मुंबईच्या केईएम रुग्णालयात दाखल करण्यात आले. त्यांच्यावर केईएम रुग्णालयात उपचार सुरू आहे.

या घटनेननंतर आरोपी गर्दुल्ल्याने पोबारा केला होता. मात्र रेल्वे पोलिसांनी या घटनेत प्रमोद वाडेकर यांच्या जबाबानुसार आरोपीचा शोध सुरु करण्यासाठी दोन पथके तैनात केली आणि सीसीटीव्ही तांत्रिक यंत्रणांच्या मदतीने २४ तासाच्या आत आरोपी गर्दुल्ल्याला भिवंडी येथून ताब्यात घेतले आहे. ताब्यात घेतलेला हा आरोपी त्याच्याकडे रेल्वे पोलिसांनी चौकशी केली असता हा आरोपी अल्पवयीन असून स्वतः विकलांग असल्याचे पोलीस तपासात निष्पन्न झाले.

गर्लफ्रेण्ड आणि दोन मित्रांसह ओयो रुम बूक, आधी केक कापला मग तिथेच जीवन संपवलं
या आरोपीची कसून चौकशी केली असता या आरोपीच्या विरोधात दादर मुंबई आणि कल्याण रेल्वे पोलीस ठाण्यात मोबाईल चोरीचे गुन्हे दाखल आहेत. तसेच या अल्पवयीन गर्दुल्ला आरोपीने कल्याण येथे मोबाईल चोरी करत असताना झालेल्या अपघातात त्याला त्याचा पाय गमवावा लागला होता, हे देखील पोलीस तपासात उघड झाले आहे.


नशेत असताना आरोपीने विनाकारण आपल्या जवळ असलेले नशेचे सोल्युशन रुमालावर टाकून त्याला आग लावून प्रदीप वाडेकर यांच्या अंगावर टाकला असल्याची कबुली या आरोपीने दिली आहे. रेल्वे पोलिसांनी या गर्दुल्ला आरोपीला अटक करून पुढील तपासाला सुरुवात केली आहे.