कुपोषण समस्या प्राधान्याने सोडवू

म. टा. वृत्तसेवा, पालघर

पालघर जिल्ह्यातील कुपोषणाची समस्या राज्याच्या तीनही विभागांमार्फत सामुदायिक जबाबदारीने सोडविण्यासाठी प्राधान्य देण्यात येणार असल्याचे राज्याच्या ग्रामविकास व महिला बालकल्याण मंत्री पंकजा मुंडे यांनी मोखाडा येथे मृत सागर वाघच्या पालकांची भेट घेतल्यानंतर बोलताना सांगितले. पंकजा यांनी यावेळी सागरच्या बहिणीच्या शिक्षणासाठी गोपीनाथ मुंडे प्रतिष्ठानतर्फे ५१ हजार रुपयांची मदतही जाहीर केली. दरम्यान, पालघर जिल्हा प्रशासनाने लागू केलेला जमावबंदी आदेश पंकजा मुंडे यांच्या दौ‍ऱ्यापूर्वी मागे घेतला.

बुधवारी सकाळी पंकजा मुंडे पालघर जिल्ह्यात दाखल झाल्या. श्रमजीवी संघटनेचे संस्थापक विवेक पंडित यांनी पंकजा मुंडे यांची मोखाडा शासकीय विश्रामगृहात भेट घेऊन कुपोषणाच्या समस्येवर चर्चा केली. त्यानंतर मुंडे मोखाडा तालुक्यातील कळमवाडी येथे पोहोचल्या. तिथे त्यांनी कुपोषणामुळे मृत्युमुखी पडलेल्या सागर वाघ या बालकाच्या पालकांची भेट घेऊन त्यांचे सांत्वन केले. जव्हार ग्रामीण रुग्णालयाला भेट देऊन तेथे उपचार सुरू असलेल्या बालकांचीही पंकजा मुंडे यांनी विचारपूस केली.

आणखी एका बालकाचा मृत्यू

जव्हार तालुक्यातील राहुल काशिराम वाडकर (वय २ वर्षे) या कुपोषित बालकाचा बुधवारी पहाटे नाशिक येथे उपचारादरम्यान मृत्यू झाला. राहुलला जव्हारच्या कुटीर रुग्णालयात दाखल केले होते. मंगळवारी त्याला जव्हार येथून नाशिकला नेण्यात आले. मात्र बुधवारी पहाटे राहुलचा मृत्यू झाला.