म. टा. प्रतिनिधी, ठाणे
अल्पवयीन मुलीचा विनयभंग करणाऱ्या एका ज्येष्ठ नागरिकाला तीन वर्षांचा कारावास तर बलात्काराच्या प्रकरणात भिवंडीतील तरुणाला सात वर्षांच्या कारावासाची शिक्षा न्यायालयाने दिली आहे. शिक्षेबरोबर आरोपींना दंडही ठोठावण्यात आला असून या दोन्ही खटल्यांचा निकाल ठाणे न्यायालयात लागला आहे.
विनयभंगाचा प्रकार ठाण्यातील कळवा परिसरात २०१४मध्ये घडला होता. पीडित दहा वर्षांची मुलगी आरोपी केतन अमृतलाल ठक्कर (रा. खारेगाव) याच्या मेडिकल दुकानासमोरून क्लासला जात असताना आरोपीने या मुलीला चॉकलेटचे आमिष दाखवून तिचा विनयभंग केला. पालकांच्या तक्रारीनंतर ठक्कर याच्याविरुद्ध कळवा पोलिस ठाण्यात गुन्हा दाखल करण्यात आला होता, अशी माहिती सरकारी वकील रेखा हिरवाळे यांनी दिली. या खटल्यात एकूण पाच साक्षीदार तपासण्यात आले. आरोपीवर गुन्हा सिद्ध झाल्याने ठाणे न्यायालयातील अतिरिक्त सत्र न्यायाधीश के. डी. शिरभाते यांनी आरोपीला तीन वर्षांच्या कारावासाची शिक्षा ठोठावली. तसेच, दंडही ठोठावला असून वेगवेगळ्या कलमाखाली शिक्षा दिली असली तरी या सर्व शिक्षा आरोपीला एकत्रित भोगायच्या आहेत. तर, लग्नाचे आमिष दाखवून अल्पवयीन मुलीवर बलात्कार करणाऱ्या आशिर्वाद विष्णू पाटील (२३, रा. खांडपे, आदिवासी पाडा, भिवंडी) याला न्यायाधीश पी. पी. जाधव यांनी सात वर्षांचा कारावास आणि १० हजार रुपये दंड न भरल्यास तीन महिन्यांची साधी कैद अशी शिक्षा सुनावली. आरोपीविरुद्ध २०१६मध्ये भिवंडी तालुका पोलिस ठाण्यात गुन्हा दाखल करण्यात आला होता. आरोपी पाटील याच्या अत्याचारामुळे पीडित अल्पवयीन मुलगी गरोदर राहिली होती. पोलिस निरीक्षक धनाजी क्षीरसागर यांनी या गुन्ह्याचा तपास करत आरोपीविरुद्ध सक्षम पुरावे जमा करत न्यायालयात सादर केले होते.