मनोज म्हात्रेंच्या दोन मारेकऱ्यांना अटक

मटा ऑनलाइन वृत्त । भिवंडी

भिवंडी महापालिकेचे सभागृह नेते मनोज म्हात्रे यांच्या निर्घृण हत्येप्रकरणी महेश पंडित म्हात्रे व मयूर ऊर्फ प्रकाश म्हात्रे या दोघांना अटक करण्यात आली आहे. या दोघांनीही गुन्ह्याची कबुली दिली आहे.

काँग्रेसचे नगरसेवक असलेले मनोज म्हात्रे हे भिवंडीतील अंजूरफाटा परिसरात राहत होते. काही दिवसांपूर्वीच त्यांचा गोळ्या घालून व कोयत्यानं वार करून खून करण्यात आला होता. खुनानंतर हल्लेखोर फरार होते. राजकीय वादातून हा खून झाला असावा, अशी शक्यता सुरुवातीला वर्तवली जात होती. मात्र, त्यामागे कौटुंबिक कारण असल्याचं आता समोर येत आहे. मनोज म्हात्रे यांच्या हत्येप्रकरणी त्यांच्या सख्ख्या चुलत भावावर संशय होता. हल्लेखोरांना अटक करण्यात आल्यामुळं व त्यांनी गुन्ह्याची कबुली दिल्यामुळं आता या प्रकरणातील सत्य समोर येण्यास मदत होणार आहे.