ठाण्यातही मराठा क्रांती मोर्चा

म. टा. विशेष प्रतिनिधी, ठाणे

राजभरात लाखोंच्या संख्यने निघणाऱ्या मराठा क्रांती मोर्चाने राजकीय नेत्यांच्या पोटात गोळा आला असतानाच आता ठाण्यातही मराठा समाजाची ताकद दाखवून देणारा मोर्चा काढण्याचा निर्णय झाला आहे. या मोर्चाचा कृती आराखडा जाहीर झाला असून लवकरच मोर्चाची तारीख जाहीर करण्यात येईल, अशी माहिती मराठा क्रांती मोर्चा ठाणे जिल्हा समन्वय समितीच्या वतीने देण्यात आली.

मोर्चाच्या नियोजन, त्यासाठी आवश्यक असलेल्या विविध समित्यांची बांधणी करण्यासाठी येत्या २५ सप्टेंबर रोजी एका बैठकीचे आयोजन करण्यात आले आहे. त्या दिवशी मोर्चाची तारीख आणि मार्ग जाहीर केला जाणार आसल्याचे समन्वय समितीच्या पदाधिकाऱ्यांनी पत्रकार परिषदेत सांगितले. १५ ते २० लाख बांधव या मार्चात सहभागी होतील, असा अंदाज समितीच्यावतीने बांधण्यात आला असून त्यानिमित्ताने जिल्ह्यात होणाऱ्या बैठकांना चांगला प्रतिसाद मिळत असल्याचेही यावेळी सांगण्यात आले. हा मूकमोर्चा असेल, कोणत्याही प्रकारच्या घोषणा त्यात दिल्या जाणार नाहीत. तसेच मोर्चाला कोणत्याही राजकीय नेत्यांचे नेतृत्व नसेल, असेही यावेळी स्पष्ट करण्यात आले. मराठा समाजाच्या विविध मागण्यांचे निवेदन ठाण्याच्या जिल्हाधिकाऱ्यांना विद्यार्थ्यांच्या हस्ते देण्यात येणार आहे. त्यासाठी स्वयं-प्रेरणेने शाळा पुढे येतील, असा विश्वास यावेळी व्यक्त करण्यात आला. राज्यघटनेनुसार प्रत्येक जातीला जे फायदे मिळण्याची तरतूद आहे, त्याची अंमलबजावणी तत्काळ व्हावी, अॅट्रोसिटी कायद्यात सुधारणा आवश्यक असून त्यासाठी सरकारने आवश्यक ते कायद्यात बदल करावे, या प्रमुख मागण्या असल्याचे मराठा नेत्यांनी स्पष्ट केले.