माथेरानची मिनिट्रेन तात्पुरती बंद

म. टा. प्रतिनिधी, उरण

माथेरानची राणी म्हणून प्रचलित असलेली मिनिट्रेन गेल्या १० दिवसांत दोनदा रुळावरुन घसरल्याने पर्यटकांमध्ये भीतीचे वातावरण आहे. वारंवार होणाऱ्या या घटनांमुळे पुढील काही दिवसांसाठी म‌निट्रेन बंद ठेवण्याचा निर्णय घेण्यात आला आहे.

सुट्टीच्या काळात माथेरानला जाणाऱ्या पर्यटकांसाठी येथील मिनीट्रेन हे मोठे आकर्षण असते. पंरतु, गेल्या काही दिवसांपासून ही मिनीट्रेन वारंवार रुळावरून घसरू लागली आहे. गेल्या दहा दिवसांत दोनवेळा मिनीट्रेन रुळावरून घसरल्याच्या घटना घडल्या आहेत. या अपघातात कोणतीही जीवितहानी झालेली नाही. रेल्वे प्रशासनाने तातडीने याची दखल घेऊन प्रवाशांच्या सुरक्षेचे उपाय करावेत, अशी मागणी नगरसेवक दिनेश सुतार यांनी केली आहे.

दरम्यान, वारंवार होणाऱ्या या अपघातांमुळे रेल्वे प्रशासनाने पुढील काही दिवसांसाठी मिनिट्रेन बंद ठेवण्याचा निर्णय घेतला आहे. त्यामुळे पर्यटकांना हातगाडी किंवा घोडेस्वारी करून माथेरान बाजारपेठ गाठावी लागत आहे. याचा फायदा घेत टॅक्सीवाले, हातगाडीवाले आणि घोडेवाल्यांनी लूट सुरू केल्याचा आरोप पर्यटक आनंद देशपांडे यांनी केला आहे.