रोजचा मार्ग बदलला आण‌ि...

उल्हासनगरच्या मीना वालेकरचा करुण अंत

म. टा. वृत्तसेवा, उल्हासनगर

एल्फिन्स्टन रेल्वे स्टेशनवरील पादचारी पुलावर झालेल्या चेंगराचेंगरीमुळे उल्हासनगर येथील कॅम्प नंबर तीन परिसरातील मीना वालेकर या ३४ वर्षीय तरुणीचा मृत्यू झाला. महाराष्ट्र कामगार मंडळात सहाय्यक अधिक्षक पदावर कार्यरत असलेली मीना रोज दादरवरून पायी जात असे, मात्र मीना त्या दिवशी रेल्वेने एल्फिन्स्टन रोड स्टेशनवरून ऑफिसला निघाली आणि पुन्हा घरी परतलीच नाही.

उल्हासनगर कॅम्प नंबर तीन परिसरात डिंपल पॅलेसमागील परिसरात मीना वालेकर कुटुंबासोबत राहत होती. दहा वर्षांपूर्वीच वडिलांचा आधार हरपल्याने, घरातील सर्व जबाबदारी मीनावर आली होती. मोठ्या बहिणीचे लग्न झाल्याने घरातील आई आणि दोन भावांचा मीना आधार होती.

एल्फिन्स्टन रोड येथील महाराष्ट्र कामगार मंडळ येथे सहाय्यक अधिक्षक या पदावर मागील पाच वर्षांपासून मीना कार्यरत होती. कल्याण येथील श्रद्धा वरपे आणि मीना या दोघी मैत्रिणी होत्या. घरातील कामे उरकून मीना रोज कामावर जात असे.

रोज दादरला उतरून ऑफिसला चालत जाणाऱ्या मीनाने शुक्रवारी मात्र दादरला ट्रेन बदलत एल्फिन्स्टन रोड रेल्वे स्टेशन गाठण्याचा प्रयत्न केला. मात्र येथील चेंगराचेंगरीत तिचा मृत्यू झाला. हा अपघात झाला त्या दिवशी सर्व वाहिन्यांवर या अपघाताची बातमी सुरू होती. मात्र मीनाच्या घरातील केबल बंद असल्याने तिच्या भावांना या घटनेची कसलीही माहिती मिळाली नाही.

तिच्या चुलत बहिणीला या अपघाताची माहिती मिळताच त्यांनी मीनाशी संपर्क केला. मात्र वारंवार फोन करूनही मीना फोन उचलत नव्हती. अखेर फोन उचलला गेला आणि एका कॉन्स्टेबलने तुम्ही केईएम हॉस्पिटलला या, असे सांगितल्याने, मीनाच्या कुटुंबावर आभाळच कोसळले. अवघे कुटुंब मीनाकडे धाव घेत असतानाच, तिच्या कार्यालयातूनही मीनाच्या अपघाताची बातमी मिळाली.