विषय समितीच्या निवडीसाठी महासभा

म. टा. वृत्तसेवा, पनवेल

महापौर, उपमहापौरांची निवड झाल्यानंतर विषय समिती सभापतींची निवड केली जाणार आहे. गुरुवारी, २७ जुलै रोजी महापालिकेची महासभा घेण्यात येणार आहे. यामध्ये समिती सदस्यांची निवड केली जाणार आहे.

पनवेल महापालिकेचे महापौर, उपमहापौर आणि इतर नगरसेवक कामकाज करण्याचा आढावा घेत आहेत. नुकतीच भाजपच्या काही ठराविक नगरसेवकांनी महापालिकेतील अधिकाऱ्यांची ओळख करण्यासाठी बैठक घेतली. महापालिकेच्या सभागृहात घेतलेल्या बैठकीत सर्व अधिकारी नगरसेवकांनी एकमेकांची ओळख करून घेतली. महापालिकेचा कारभार हळूहळू सुरू होत आहे. पनवेल महापालिकेत येणाऱ्या विषय समिती सदस्यांची निवड करण्यात येणार आहे. समितीनिहाय सदस्यसंख्या निश्चित करण्यात येणार आहे. याच बैठकीत महापालिकेने तयार केलेल्या सभा कामकाजाच्या प्रारूप मसुदाही मान्यतेसाठी ठेवला जाणार आहे. गुरुवारच्या बैठकीत सदस्यांची निवड केल्यानंतर सभापतींची निवड होईल. विशेष महासभेनंतर महापालिकेची ही पहिलीच सर्वसाधारण महासभा असणार आहे. महापालिकेच्या फडके नाट्यगृहात सकाळी ११ वाजता बैठक होणार आहे.

नगरसेवक होणार विशेष कार्यकारी अधिकारी

महापालिकेचे सदस्य म्हणून निवडून आलेल्या नगरसेवकांनी विशेष कार्यकारी अधिकारीपदी पदसिद्ध नियुक्ती होणार आहे. जिल्हाधिकाऱ्यांच्या आदेशानुसार आवश्यक कागदपत्रांची पूर्तता करून पनवेल तहसीलदार कार्यालयामार्फत ही नियुक्ती होईल. महापालिकेने याबाबतची माहितीदेखील प्रत्येक सदस्याला दिली आहे. महापालिका सदस्यांनी आवश्यक कागदपत्रांची पूर्तता करण्याचे आवाहन महापालिकेने पत्राच्या माध्यमातून केले आहे.