ठाणे-पनेवल वाहतूक सहा तास बंद
म. टा. प्रतिनिधी, ठाणे
मध्य रेल्वे आणि ट्रान्स हार्बर मार्गावर घेण्यात आलेल्या मेगाब्लॉकमुळे रविवारचा रेल्वे प्रवास मनस्ताप आणि अडथळ्यांचा ठरला. ठाण्यातून पनवेलच्या दिशेने जाणाऱ्या प्रवाशांना सकाळी १० वाजल्यापासून ते साडेचार वाजेपर्यंत लोकल नसल्यामुळे या दिशेने जाणारे प्रवासी रखडून पडले होते. काहींनी पर्यायी वाहतुकीचा मार्ग स्वीकारला. परंतु रेल्वेतील गर्दीमुळे मेगाब्लॉकचा फटका कायम होता. गेल्या दोन रविवारी सुमारे नऊ तासांचे दोन ब्लॉक धीम्या मार्गावर घेण्यात आले होते. तर या रविवारी जलद मार्गावर सहा तासांचा ब्लॉक घेतल्यामुळे कल्याणच्या दिशेने जाणाऱ्या प्रवाशांना धीम्या मार्गावरून प्रवास करावा लागला.
रविवारी मध्य रेल्वेच्या मुख्य मार्ग आणि ट्रान्स हार्बर मार्गावरही ब्लॉक घेण्यात आला होता. सकाळी दहा वाजल्यापासून सुरू झालेला हा ब्लॉक दुपारी साडेतीन वाजेपर्यंत होता. यामुळे अनेक लांबपल्ल्याच्या गाड्या धीम्यामार्गावर वळवण्यात आल्या होत्या. त्यामुळे धीम्या मार्गावरील ताण वाढून लोकलचे वेळापत्रक कोलमडून गेले. तसेच अनेक गाड्या १५ मिनिटे उशिराने धावण्याचा प्रशासनाचा दावा असला तरी प्रत्यक्षात या गाड्या अर्धा ते एक तास उशिराने धावत असल्याचे स्पष्ट झाले. उन्हाच्या झळा आणि गर्दीची धक्काबुक्की अशा वातावरणातून प्रवास करण्याची वेळ प्रवाशांवर आली होती. ट्रान्स हार्बर मार्गावरील प्लॅटफॉर्मवर दुपारी शुकशुकाट होता. वाहतूक सुरू झाल्यानंतर या प्लॅटफॉर्मवर गर्दीचा उच्चांक होता. उद्घोषणा होत नसल्यामुळे हा त्रास अधिकच जाणवत होता.