म. टा. वृत्तसेवा, ठाणे
व्यापाऱ्याला बोगस डिमांड ड्राफ्ट देत फसवणूक करणाऱ्या गुजरातमधील एका व्यक्तीला ठाणे ग्रामीण पोलिसांच्या स्थानिक गुन्हे शाखेने बोरीवलीतून अटक केली. त्याला सोमवारपर्यंत पोलिस कोठडी देण्यात आली असून त्याच्याविरुद्ध अन्य एका पोलिस ठाण्यात फसवणुकीचा गुन्हा दाखल आहे.
कमलेश शिवदास शेजपाल उर्फ राजेश जैन उर्फ अशोक जैन उर्फ नितीन जैन उर्फ राजेश ठक्कर (५५) असे आरोपीचे नाव आहे. पूनम सागर कॉम्प्लेक्समधील देवांश इंटरप्राइज या इलेक्ट्रॉनिक्स वस्तूंच्या दुकान मालकाला कमलेशने १ लाख ६५ हजारांचा स्टेट बँक ऑफ इंडियाच्या सुरत शाखेचा बोगस डिमांड ड्राफ्ट देऊन ५ एलईडी टीव्ही बुक केले होते. १५ मे रोजी दुकान मालकाने टीव्ही दिलेल्या पत्त्यावर पाठवले. मात्र नंतर फसवणूक झाल्याचे लक्षात येताच त्याने दिलेल्या तक्रारीनंतर नयानगर पोलिस ठाण्यात गुन्हा दाखल करण्यात आला होता. या गुन्ह्याचा तपास करणाऱ्या स्थानिक गुन्हे शाखेचे सहाय्यक पोलिस निरीक्षक प्रमोद बडाख, पोलिस उपनिरीक्षक अभिजीत टेलर यांच्या पथकाने आरोपीला बोरीवलीतील नॅशनल पार्क भागातून अटक केले.
फसवणुकीची अनोखी पद्धत
आरोपी हा वेगवेगळ्या साइट्सवरून इलेक्ट्रॉनिक्स उत्पादने, कॉफी शॉप, आंबे, कपड्याचे व्यापारी यांचे फोन क्रमांक मिळवत होता. नंतर या व्यापाऱ्यांकडे मालाबाबत चौकशी करून अस्तित्वात नसलेल्या कंपन्यांचा मालक असल्याचे भासवून मालाची ऑर्डर द्यायचा. नंतर स्वत:च कंपनीचा प्रतिनिधी या नात्याने व्यापाऱ्यांची भेट घेऊन व्यापाऱ्यांना बोगस धनादेश तसेच डिमांड ड्राफ्ट देऊन माल घेत होता. हैदराबादमधील पतंजलीच्या वस्तूंची विक्री करणाऱ्या व्यापाऱ्याचीदेखील त्याने फसवणूक केली असून याप्रकरणी चारमिनार पोलिस ठाण्यात गुन्हा दाखल आहे.