म. टा. वृत्तसेवा, वसई
जंगलात आपल्या आईपासून दुरावलेल्या बिबळ्याच्या बछड्याला दत्तक घेऊन आपल्या मुलाच्या वाढदिवसाला आमदार प्रताप सरनाईक यांनी अनोखी भेट दिली आहे. तसेच बिबळ्याच्या आजीवन संगोपनाची जबाबदारीही त्यांनी घेतली असून बछड्याला दत्तक घेण्याची सर्व प्रक्रिया त्यांनी बोरिवली नॅशनल पार्कमध्ये पूर्ण केली.
येऊर जंगल परिसरात बिबळ्याचा लहान बछडा असल्याचे लक्षात आले होते. त्यावेळी तत्काळ वनविभागाने येऊन या बछड्याला ताब्यात घेतले होते. या बछड्याची त्याच्या आईशी भेट व्हावी, यासाठी ३ दिवस जंगलात मुक्तपणे सोडण्यात आले होते. मात्र या बछड्याची त्याच्या आईशी भेट होऊ शकलेली नाही. तेव्हापासून या बछड्याची चिंता सरनाईक व त्यांच्या सर्व कुटुंबीयांना होती. अखेर या बछड्याला दत्तक घेण्याचा निर्णय आमदार सरनाईक यांनी घेतला आणि त्यांच्या मुलाच्या वाढदिवशी म्हणजेच २८ डिसेंबर रोजी त्याला दत्तक घेतले. शिवसेना आमदार प्रताप सरनाईक यांचा मुलगा पूर्वेश सरनाईक हे युवा सेनेचे सचिव आणि नगरसेवक आहेत. त्यांच्या २८व्या वाढदिवसाच्या निमित्ताने २८ तारखेला २८ दिवसांचा बछडा सरनाईक यांनी आपल्या मुलाला भेट दिला.
संजय गांधी राष्ट्रीय उद्यान, बोरिवली येथे या बछड्याचे नुकताच नामकरण करण्यात आले. पूर्वेश सरनाईक यांना घरात बिट्टू हे नाव आहे. बिबळ्या किंवा वाघ हा जंगलाचा राजा आहे. त्यामुळे या बिबळ्याच्या बछड्याचे 'बिट्टू बॉस' असे नामकरण करण्यात आले आहे. हा बिबळ्याचा बछडा आईपासून दुरावल्याने डॉक्टर पेठे हे त्याची गेले काही दिवस काळजी घेत आहेत. खास अमेरिकेवरून या बछड्यासाठी दुधाची पावडर मागविण्यात आली व त्यातून त्याचे संगोपन सुरू आहे. पुढील १ महिन्यानंतर मांसाहार व इतर आहार बछड्याला देण्यास सुरुवात होणार आहे. बिबळ्याचा बछडा बोरिवली येथील राष्ट्रीय उद्यानात राहणार आहे, असे सरनाईक यांनी सांगितले.