बदलापुरातही मनसे आक्रमक

म. टा. वृत्तसेवा, बदलापूर

मनसेने दादर आणि डोंबिवलीत फेरीवाल्यांविरुद्ध केलेल्या आंदोलनानंतर रविवारी संध्याकाळी बदलापूर रेल्वे स्टेशन परिसरात मनसेच्या कार्यकर्त्यांनी आपला मोर्चा वळवला.

बदलापूर पूर्व आणि पश्चिम भागात फेरीवाल्यांची दादागिरी प्रचंड वाढली आहे. एल्फिन्स्टन रेल्वे स्टेशनच्या दुर्घटनेनंतर रेल्वे स्टेशन आणि परिसरात फेरीवाल्यांना हटवण्याची मोहीम सुरू करण्यात आली आहे. मात्र सांध्यकाळच्या वेळी बदलापूर रेल्वे स्टेशन परिसरात फेरीवाल्यांचा वावर पुन्हा वाढला. या फेरीवाल्यांमुळे नागरिकांसह रेल्वे प्रवाशांनादेखील त्रास सहन करावा लागत आहे.

अखेर रविवारी संध्याकाळी रेल्वेच्या परिसरात बसणाऱ्या फेरीवाल्यांविरोधात बदलापूर मनसेच्या वतीने धडक कारवाई करण्यात आली. मनसेचे शहराध्यक्ष उमेश तावडे, संगीता चेंदवणकर, भाई जाधव, किरन भगत यांच्यासह कार्यकर्त्यांनी फेरीवाल्यांना हटवण्याचे काम केले. एवढेच नव्हे, तर रेल्वे पोलिसांनादेखील यापुढे योग्य प्रकारे कारवाई करण्याच्या सूचना मनसेने दिल्या. मनसेच्या या कारवाईनंतर स्टेशन परिसर फेरीवालामुक्त झाला होता.