म. टा. वृत्तसेवा, पालघर
महाराष्ट्र नवनिर्माण सेनेचे पालघर जिल्हाप्रमुख कुंदन संखे यांनी बुधवारी रात्री उशिरा मातोश्रीवर जाऊन उद्धव ठाकरे यांच्याकडून शिवबंधन बांधून घेत शिवसेनेत प्रवेश केला.
महाराष्ट्र नवनिर्माण सेना या राजकीय पक्षाच्या स्थापनेपासून त्या पक्षासोबत असलेले पालघर जिल्हा प्रमुख कुंदन संखे यांनी बुधवारी रात्री उशिरा मातोश्रीवर जाऊन शिवसेनेत प्रवेश केला आहे. शिवसेना पक्षप्रमुख उद्धव ठाकरे यांनी त्यांना शिवबंधन बांधून भगवा झेंडा हातात देऊन स्वागत केले. यावेळी ठाणे जिल्ह्याचे पालकमंत्री व आरोग्यमंत्री एकनाथ शिंदे शिवसेना पालघर जिल्हा संपर्कप्रमुख रवींद्र फाटक व पालघर जिल्ह्यातील शिवसेनेचे ज्येष्ठ पदाधिकारी उपस्थित होते.
संखे पूर्वी भारतीय विद्यार्थी सेनेमध्ये तालुका प्रमुखपदावर होते. त्यानंतर त्यांनी मनसेत प्रवेश केला. त्यांनी मनसेचे पदाधिकारी व कार्यकर्त्यांना बरोबर घेऊन अनेक आक्रमक आंदोलने केली. मध्यंतरीच्या काळात काही कारणास्तव त्यांनी जिल्हाध्यक्षपदाचा राजीनामा दिला होता, परंतु दीड वर्षा नंतर पुन्हा त्यांना पालघर जिल्हा अध्यक्षपदाची जबाबदारी देण्यात आली. ते पुन्हा सक्रिय झाले होते. त्यांनी मनसे सोडून अचानक शिवसेना दाखल होण्याचा निर्णय घेतल्याने सर्वत्र आश्चर्य व्यक्त होत आहे. पक्षवाढीसाठी पुरेसे पाठबळ मिळाला पाहिजे, ते पक्षाकडून मिळत नसल्याने मी मनसे हा पक्ष सोडण्याचा निर्णय घेऊन शिवसेनेत दाखल झालो, असे कुंदन संखे यांनी पत्रकारांशी बोलताना सांगितले.