मनसेचा आंदोलनाचा इशारा

उल्हासनगर : पालिका शाळा सुरू होऊन तीन आठवडे उलटले असतानाही महापालिका शाळेतील विद्यार्थ्यांना अद्याप शालेय साहित्य व गणवेशाचे वाटप न झाल्याने विद्यार्थ्यांचे शैक्षणिक नुकसान होत आहे. महापालिकेने येत्या आठ दिवसांत हे वाटप न केल्यास महानगरपालिकेसमोर आंदोलन करण्याचा इशारा मनसेने दिला आहे.

उल्हासनगरमधील आरटीईअंतर्गत प्रवेशास पात्र असणाऱ्या शाळांमध्ये आर्थिक दुर्बल घटकातील प्रवेश मिळालेल्या विद्यार्थ्यांनाही नियमाप्रमाणे शाळा प्रशासनाने शालेय साहित्य व गणवेश मोफत द्यायचे आहेत. परंतु उल्हासनगरमधील काही शाळा या विद्यार्थ्यांना शालेय साहित्य व गणवेश देण्यास टाळाटाळ करत आहेत. या शाळांना मनविसेकडून शालेय साहित्य व गणवेशाच्या वाटपासाठी आठ दिवसांची मदत देण्यात आली. जर या शाळांनी आठ दिवसांत या विद्यार्थ्यांना शालेय साहित्य व गणवेश दिले नाहीत, तर महानगरपालिका कार्यालयासमोर ठिय्या आंदोलन करण्यात येईल, असा इशारा मनविसेचे कल्याण जिल्हा उपाध्यक्ष बंडू देशमुख व उल्हासनगर शहर अध्यक्ष मनोज शेलार यांनी लेखी निवेदनाद्वारे दिला.