आधुनिक तंत्रज्ञानाचा वापर करावा

म.टा. वृत्तसेवा, पालघर

जिल्हा परिषद शाळेतील विद्यार्थ्यांसाठी आधुनिक तंत्रज्ञानाचा वापर करून गुणवत्तापूर्ण शिक्षण उपलब्ध करून देण्यासाठी शिक्षकानी पुढाकार घ्यावा, असे आवाहन जिल्हा परिषदचे अध्यक्ष विजय खरपडे यांनी केले.

जिल्हा परिषद संकुल सभागृह येथे सेस फंडातून जिल्ह्यातील ९२ शाळांसाठी प्रोजेक्टर वाटपाच्या कार्यक्रमप्रसंगी ते बोलत होते. पालघरसारख्या आदिवासी बहुल जिल्ह्यासाठी आधुनिक शिक्षण हे अतिशय उपयुक्त आहे आणि या तंत्रज्ञानाचा वापर करून हे विद्यार्थी भविष्यात नकीच प्रगतीपथावर पोहोचतील. यासाठी शिक्षकांनी मेहनत घ्यावी व सहकार्य करावे, असे आवाहन त्यांनी केले. तसेच पालघर जिल्ह्यातील सर्व शाळा लवकरात लवकर डिजिटल करण्यात येतील, असे आश्वासन दिले.

शिक्षण समिती अध्यक्ष व जिल्हा परिषद उपाध्यक्ष नीलेश गंधे यांच्या मार्गदर्शनाखाली शाळा डिजिटल व प्रगत करण्यावर भर दिला जात आहे. गंधे म्हणाले की, आजचा काळ तंत्रज्ञानाचा आहे. प्रत्येकाला तंत्रज्ञान अवगत असायला पाहिजे तसेच विद्यार्थ्यांमध्ये तंत्रज्ञान रुजवणे ही शिक्षकाची जबाबदारी आहे. यासाठी शाळा डिजिटल होणे आवश्यक आहे. यामुळे अनेक क्लिष्ट संकल्पना विद्यार्थ्यांना सोप्या भाषेत व जास्तीत जास्त प्रभावीपणे समजवता येतात.

सर्व शिक्षकांनी आपली शाळा डिजिटल करण्यासाठी तत्परतेने कार्य करावे. तसेच त्यासाठी डिजिटल अभ्यासक्रम तयार केला आहे त्याची अंमलबजावणी करावी, असे आवाहन मुख्य कार्यकारी अधिकारी मिलिंद बोरीकर यांनी केले.

या प्रसंगी जिल्हा परिषदेच्या महिला बाल कल्याण सभापती धनश्री चौधरी, बांधकाम सभापती दामोदर पाटील, शिक्षण समितीचे सदस्य गीता धामोडे, मिताली राऊत, अशोक भोये, चित्रा किणी, हेमलता राठोड, तुळशीदास तामोरे, रडका कालंगडा, संजय म्हात्रे , शिक्षण अधिकारी (प्रा.) संगीता भागवत, शिक्षण अधिकारी (मा.), जिल्हा आरोग्य अधिकारी संतोष गायकवाड, सर्व गट शिक्षण अधिकारी, शिक्षक आणि अधिकारी कर्मचारी उपस्थित होते.