पोलिस स्टेशनमध्ये माकडाचा धुडगूस; ठाण्यात एका महिन्याच्या बाळावर हल्ला केला पण...

ठाणेः ठाण्यात एका उपद्रवी माकडामुळं सगळ्यांचे धाबे दणाणले आहेत. ठाण्यातील शिळ-डायघर पोलिस ठाण्याच्या हद्दीत उपद्रवी माकडाने एक महिन्याच्या चिमुकलीवर हल्ला केला आहे. रविवारी सकाळी हा प्रकार घडला आहे. आईच्या हातात असलेल्या एक महिन्याच्या बाळाला हिसकावण्याच्या प्रयत्न या माकडाने केला होता. त्यामुळं परिसरात दहशत माजली आहे.

रविवारी सकाळी एक महिला बाळासह घरगुती हिंसाचाराची तक्रार नोंदवण्यासाठी पोलिस ठाण्यात आली होती. त्यावेळी ती पोलिस स्थानकाच्या बाहेर थांबली होती. त्याचवेळी एक माकड पोलिस ठाण्यात आलं आणि माणसांना घाबरवण्यास सुरुवात केली. तितक्यात हे माकडं बाहेरच थांबलेल्या माय-लेकीकडे गेलं आणि महिलेच्या हातातून बाळाला हिसकवण्याचा प्रयत्न केला. यावेळी महिलेने माकडाला हुसकवण्याचा प्रयत्न केला, असं पोलिस स्थानकातील कर्मचाऱ्याने सांगितले.

वाचाः भाविकांसाठी पर्वणी; सप्तश्रृंगी देवीच्या मूळ व स्वयंभू स्वरूपातील मूर्तीचे दर्शन; गडावर नवरात्र उत्सवाला सुरुवात

माकड बाळाला हिसकवण्याच्या प्रयत्नात असताना माकडाने पंजा बाळाच्या डोक्यावर मारला. त्यामुळं चिमुकलीच्या डोक्याला गंभीर दुखापत झाली. त्यानंतर लगेचच महिला बाळाला घेऊन जवळच्या रुग्णालयात धावली. बाळाची प्रकृती सध्या स्थिर असून तिच्या डोक्यावर पाच टाके पडले आहेत. ते माकडं माझ्या आणि बाळाच्या दिशेने येत असल्याचं पाहून मी खूप घाबरले होते. त्यानं माझ्या बाळाला माझ्यापासून हिसकावण्याचा प्रय़त्न केला. पण मी त्याला घट्ट धरुन ठेवलं होतं. जर मी तसं केलं नसतं तर माकड बाळाला घेऊन गेलं असतं. मात्र, सुदैवानं असं काही झालं नाही.

वाचाः नोकरावर विश्वास ठेवला त्यानेच दगा दिला; मालकाच्या कुटुंबाला सूपातून दिलं नशेचे औषध, पण नंतर आला मोठा ट्विस्ट..

पोलिस ठाण्यात अचानक घुसलेल्या माकडाला हाकलवण्यासाठी पोलिस प्रयत्न करत होते. मात्र, अचानक ते माकडं चिडले आणि त्याने हल्ला चढवला. त्याचवेळी पोलिसांनी वन विभागाच्या कर्मचाऱ्यांना फोन केला. त्यांनी तातडीने घटनास्थळी धाव घेत माकडाला पकडले. दरम्यान, हे माकडं एखाद्या रेस्क्यू सेंटरमधून पळून आल्याची शक्यता पोलिसांनी वर्तवली आहे.