म. टा. प्रतिनिधी, ठाणे
सेवानिवृत्त पोस्ट मास्तरच्या डोळ्यात मिरची पूड टाकून मारहाण करत अत्यंत नियोजित पद्धतीने मोबाइल, पैसे आणि दागिन्यांची लूट करणाऱ्या आई आणि तिच्या दोन मुलांना ठाणे ग्रामीण पोलिसांच्या स्थानिक गुन्हे शाखेने अटक केली आहे. काशिमीरा येथील पेणकर पाडा रस्त्यावर लुटीचा प्रकार घडला होता.
बोरिवलीला राहणारे ६९ वर्षीय सेवानिवृत्त पोस्ट मास्तर ४ ऑगस्ट रोजी रिक्षाने भाईंदरला येत असताना मोटारसायकलवरून आलेल्या लुटारूंनी त्यांच्या डोळ्यात मिरची पूड टाकली आणि त्यांच्याकडील एक लाख पाच हजारांचा ऐवज लुटल्यानंतर आरोपी पसार झाला. काशिमीरा पोलिस ठाण्यात गुन्हा दाखल करण्यात आल्यानंतर स्थानिक गुन्हे शाखेने आरोपींचा शोध चालू केला. तबरेज उर्फ मुन्ना आजम खान (२४, रा. वसई) या रिक्षाचालकाला अटक केली. त्याने आई आणि लहान भाऊ यांच्या सोबत मिळून ज्येष्ठ नागरिकाला लुटल्याचे चौकशीत निष्पन्न झाले. त्यानुसार ज्योती ऊर्फ निलोफर ऊर्फ अनिता गोपाल वायफलकर (३८) तिचा मुलगा मेहताब ऊर्फ छोटू आजम खान (२३) यांना मुंबईतील दिंडोशी भागातून अटक केली. आई आणि तिच्या मुलांच्या चौकशीत लुटीचा संपूर्ण प्रकार उघडकीस आला असून ज्येष्ठ नागरिकांशी ज्योतीशी काही महिन्यांपूर्वी ओळख झाली होती. मुलाच्या उपचारासाठी तिने या ज्येष्ठाकडून पैसे उसने घेतले होते. मात्र तिला आणखी पैशाची गरज होती. त्यामुळे ज्येष्ठ नागरिकाला लुटण्याचा कट रचला.
ज्योतीने उधार घेतलेले पैसे देण्याचा बहाणा करून ज्येष्ठ नागरिकाला काशिमीरा परिसरात बोलवले. अगोदरच त्याठिकाणी मिरची पूड घेऊन तिची दोन मुले उभी होती. ज्येष्ठ नागरिक येताच आरोपींनी त्यांच्या डोळ्यात मिरची पूड टाकत लूट केली होती. तबरेज हा सराईत आरोपी असून त्याच्यावर यापूर्वी चोरीचे गुन्हे दाखल असल्याची माहिती पोलिसांनी दिली.