राष्ट्रवादी महिला आघाडीचे सरकारविरोधात आंदोलन

म. टा. वृत्तसेवा, वसई

राज्य सरकार स्त्रियांना मानाने जगण्याचा अधिकार देत नसल्याचा आरोप करीत सरकारचा निषेध नोंदविण्यासाठी राष्ट्रवादी काँग्रेसच्या महिला आघाडीतर्फे आज, गुरुवारी वसईत आंदोलन केले जाणार आहे, असे सांगण्यात आले.

अहमदनगर जिल्ह्यातील कोपर्डी येथील अल्पवयीन मुलीवर बलात्कार आणि अमानुष हत्येला वर्ष पूर्ण झाले तरी अद्याप याप्रकरणी निकाल लागलेला नाही. महाराष्ट्रासारख्या पुरोगामी राज्यात महिलांवरील अत्याचारांनी परिसीमा गाठली आहे. स्त्री म्हणून तिच्या आत्मसन्मानाला ठेच पोहोचवणाऱ्या गुन्हेगाराला वचक बसला पाहिजे. स्त्रियांना मानाने जगण्याचा अधिकार न देणाऱ्या सरकारचा आम्ही निषेध करीत आहोत, असे राष्ट्रवादीने म्हटले आहे.

कोपर्डी बलात्कार आणि हत्या तसेच महिला अत्याचारांतील आतापर्यंतच्या सर्व प्रकरणांतील आरोपींवर जलदगती न्यायालयात खटले दाखल होऊन त्यांना कठोरातल्या कठोर शिक्षा मिळण्याची मागणी करण्यात आली आहे. लोकशाही मार्गाने १३ जुलैला दुपारी १ वाजता राष्ट्रवादीच्या नेत्यांसह तहसीलदारांना भेटून निवेदन सादर करण्यात येईल, असे महिला राष्ट्रवादी काँग्रेस वसई-विरार शहर जिल्हाध्यक्षा मनीषा उके यांनी सांगितले. जिल्हाध्यक्ष गोविंदा गुंजाळकर, कार्याध्यक्ष राजाराम मुळीक हेही सहभागी होणार आहेत.