‘सिंहगड एक्स्प्रेस’ला ठाण्यात थांबा

कर्जत : ११०१० अप पुणे-मुंबई सिंहगड एक्स्प्रेस १ एप्रिल ते ३० जून या कालावधीत ठाण्याला थांबणार असल्याचे रेल्वे प्रशासनाने कळविले आहे. हा एक मिनिटाचा ‘ऑपरेशनल’ थांबा असेल, असे नमूद करण्यात आले आहे. प्रामुख्याने ठाण्यातील प्रवाशांना याचा फायदा होणार आहे.

मुंबईहून पुण्याकडे जाताना ही गाडी ठाणे स्थानकात थांबते, परंतु पुण्याहून मुंबईला येताना ठाण्याला थांबत नसे. सकाळी ६ वाजून ५ मिनिटांनी पुणे स्थानकातून सुटणारी ही गाडी शिवाजीनगर, खडकी, पिंपरी, चिंचवड, लोणावळा, खंडाळा कर्जत, कल्याणनंतर थेट दादरला थांबत होती. परिणामी प्रवाशांना कल्याण रेल्वे स्थानकावर उतरून लोकलने ठाण्याला जावे लागत होते. शिवाय ही गाडी कल्याणला सकाळी ८ वाजून ४२ मिनिटांनी येत असल्याने या ऐन गर्दीच्या वेळी कुटुंब व सामानासह कल्याणहून ठाण्यासाठी लोकल पकडणे जिकरीचे होत असे.