मुंब्रा बायपासचे काम सुरू; चाकरमान्यांचे मात्र हाल

ठाणे: मुंब्रा बायपासच्या कामाचा अखेर श्रीगणेशा झाला असून सोमवार रात्रीपासून या धोकादायक रस्त्याच्या दुरूस्तीच्या कामाला सुरूवात झाली आहे. रात्रीपासूनच मुंब्रा बायपास रस्ता बंद करण्यात आल्याने ऐरोली, शिळफाटा या पर्यायी मार्गावर पहाटेपासूनच मोठी वाहतूक कोंडी झाली असून कामावर निघालेल्या चाकरमान्यांची मात्र प्रचंड गैरसोय होत आहे.

मुंब्रा बायपास मार्गाच्या दुरुस्तीच्या कामामुळे वाहतूक ऐरोली, शिळफाटा मार्गे वळवण्यात आली. पुढील दोन महिने मुंब्रा बायपास या मार्गावरील वाहतूक पूर्णपणे बंद राहणार असून प्रवाशांना याच पर्यायी मार्गाचा वापर करावा लागणार आहे.

ही कोंडी फोडण्यासाठी वाहतूक पोलिसांनी वाहतुकीच्या मार्गात बदल केले आहेत. उरणमधील जेएनपीटी बंदरातून नाशिक आणि गुजरातच्या दिशेने वाहतूक करणारी अवजड वाहनं मुंब्रा बायपास मार्गाचा वापर करतात, परंतु या मार्गावरील अवजड वाहतूक आता दुपार आणि रात्रीच्या वेळेस ठाणे, मुंबई, नवी मुंबई, कल्याण, ठाणे ग्रामीण आणि पालघर भागातून वळवण्यात येणार आहे. तसेच, घोडबंदर मार्गावर दुपारी १२ ते ४ या वेळेतही नियंत्रित पद्धतीने अवजड वाहतूक सुरु ठेवण्यात येणार आहे.