करवाढीविरोधात मुंडन आंदोलन

अंबरनाथ : शहरात नागरी सुविधांची वानवा असताना नगरपरिषदेने अचानक केलेल्या तिप्पट करवाढीविरोधात अंबरनाथच्या रिपब्लिकन सेनेने अंबरनाथ नगरपरिषद मुख्यालयासमोर मुंडन आंदोलन केले.

शहरात प्राथमिक सुविधांचा बोजवारा उडाला आहे. एकीकडे पालिकेने पुर्नमूल्यांकनाच्या नावाखाली अंबरनाथ नगरपरिषदेने यावर्षी तब्बल तिप्पट मालमत्ता कर आकारल्याने अंबरनाथकरांनी चांगलाच धसका घेतला. तिप्पट कर आकारणीविरोधात हरकती नोंदवण्यासाठी मालमत्ताधारकांनी अंबरनाथ नगरपरिषदेमध्ये मोठ्या रांगा लावल्या असून हरकतींचा चक्क पाऊस पडताना दिसत आहे. या करवाढीविरोधात मात्र अद्याप ठोस निर्णय घेण्यात आला नाही.

उमर इंजिनीअरचा अनोखा निषेध

सर्वसाधारण सभा सुरू होणार असताना राष्ट्रवादी पुरस्कृत रिपाइंचे नगरसेवक उमर इंजिनीअर यांनी परिधान केलेल्या पोषाखावर पालिकेच्या वाढीव मालमत्ता कराच्या निषेधाचे संदेश लिहून व हातात निषेधाचा फलक घेऊन सभागृहात प्रवेश केला.