उद्धव यांच्या कुंडल्या माझ्याकडे आहेतः राणे

मटा ऑनलाइन वृत्त । डोंबिवली

राजकारणाच्या पीचवर नवी इनिंग्ज सुरू करायला निघालेले राज्याचे माजी मुख्यमंत्री नारायण राणे यांनी आपलं लक्ष्य, इरादा स्पष्ट केला आहे. डोंबिवलीतील कार्यकर्ता मेळाव्यात त्यांनी शिवसेना पक्षप्रमुख उद्धव ठाकरे यांच्यावर शरसंधान केलं.

'२००५ साली मी फक्त उद्धव ठाकरेंमुळे शिवसेनेतून बाहेर पडलो. मी साहेबांना त्रास दिला नाही. साहेबांना सांगून बाहेर पडलो. उलट, बाळासाहेबांना जेवढा त्रास उद्धव ठाकरेंनी दिला तेवढा कोणत्याच मुलानं आपल्या बापाला दिला नसेल. मी याला साक्षीदार आहे', असा थेट हल्ला नारायण राणे यांनी चढवला. उद्धव ठाकरेंचा एकेरी उल्लेख करत, माझ्याकडे सगळ्या कुंडल्या आहेत, बोलायला लावू नका नाहीतर पळता भुई थोडी होईल, असा इशारा त्यांनी दिला.

येत्या १ ऑक्टोबरला नारायण राणे आपल्या पुढच्या राजकीय वाटचालीबाबत महत्त्वपूर्ण घोषणा करणार आहेत. नवा पक्ष स्थापन करून रालोआमध्ये सहभागी होण्याचा फॉर्म्युला त्यांना भाजपनं दिलं आहे. त्यांना विधानपरिषदेवर निवडून आणून राज्य मंत्रिमंडळात महसूल खातं देण्याचंही ठरल्याचं कळतं. असं असतानाच, त्यांनी उद्धव ठाकरेंवर हल्ला चढवला आहे. त्यामुळे भाजपनंच त्यांच्याकडे हे 'मिशन' सोपवलंय की काय, अशी कुजबूज राजकीय वर्तुळात ऐकू येतेय. तसंच, शिवसेना आणि राणे यांच्यात पुन्हा शाब्दिक युद्ध भडकण्याचीही शक्यता आहे.