म.टा. प्रतिनिधी, मुंबई
आर्थिक संकटात असलेल्या जेट एअरवेजचे माजी मालक व भागधारक नरेश गोयल व त्यांच्या पत्नी अनिता यांना मुंबईहून दुबईमार्गे लंडनला जाताना विमानातून उतरविण्यात आले. या दोघांविरुद्ध 'लूकआऊट' नोटिस असल्याने त्यांच्यावर 'इमिग्रेशन'ने कारवाई केली. सध्या हे दोघेही इमिग्रेशन विभागाच्याच ताब्यात असल्याचे वृत्त आहे.
नरेश गोयल यांनी सुरू केलेली जेट एअरवेज कंपनी भीषण आर्थिक संकटात आहे. कंपनीतील कर्मचाऱ्यांना चार महिन्यांपासून पगार मिळालेला नाही. कंपनीतील संचालकांनीही राजीनामा दिला आहे. या सर्व पार्श्वभूमीवर गोयल हे विजय मल्ल्यासारखे देश सोडून पळून जाऊ नयेत, यासाठी इमिग्रेशनने त्यांच्याविरुद्ध नोटिस बजावली होती. त्यादरम्यान त्यांनी शनिवारी पहाटे मुंबईहून परदेशात जाण्याचा प्रयत्न केला.
सूत्रांनुसार, गोयल दाम्पत्य शनिवारी पहाटे एमिराट्स एअरलाइन्सच्या विमानाने दुबईला रवाना होत होते. सर्व प्रकारच्या तपासणीनंतर ते विमानात चढले. विमान उड्डाणासाठी 'टॅक्सी वे'वरून धावपट्टीकडे जात होते. त्याचवेळी वैमानिकांना अचानक विमान माघारी घेण्याचा संदेश देण्यात आला. त्यानंतर इमिग्रेशनच्या अधिकाऱ्यांनी या दोघांना विमानातून खाली उतरवले. याखेरीज अन्य एका प्रवाशालाही वैद्यकीय कारणाने विमानातून उतरविण्यात आले. या सर्व गोंधळात विमानाला जवळपास दीड तास विलंब झाला.
जेट एअरवेज जवळपास २४०० कोटींनी तोट्यात आहे. कंपनीच्या डोक्यावर ८५०० कोटींचे कर्ज आहे. या स्थितीत कंपनीला मागे सोडून गोयल हे देश सोडून पळून जाण्याची भीती आहे. त्यामुळेच त्यांच्याविरुद्ध 'लूकआऊट' नोटिस बजाविण्यात आली आहे, असे सूत्रांनी सांगितले.