बेबी कॅरिअरमधून घडवले करिअर; स्वानुभवातून झाला झोळी, झबला आणि मोअरचा जन्म

प्रशांत मोरे,ठाणे : गरज ही जशी शोधाची जननी असते. त्या शोधयात्रेतून एखादा नवा उद्योग सुरू करण्याची संधीही मिळू शकते, हे ठाण्यातील कौशल सोवनी यांनी स्वत:च्या कर्तृत्वाने दाखवून दिले आहे. विशेष मुलांना प्रशिक्षण देण्याचे काम करणाऱ्या कौशल सोवनी यांनी १२ वर्षांपूर्वी स्वत: गरोदर असताना होणाऱ्या बाळासाठी बेबी कॅरिअरचा शोध सुरू केला. तेव्हा लहान मुलांसाठी अत्यंत आवश्यक असणाऱ्या या साधनाचे फारसे चांगले पर्याय बाजारात उपलब्ध नाहीत, हे त्यांच्या लक्षात आले. त्यामुळे त्यांनी स्वत: बेबी कॅरिअर बनवले. प्रसुतीनंतर अवघ्या नऊ दिवसांतच या स्वनिर्मित कॅरिअरमध्ये मुलगी - गार्गीला ठेवून त्या घराबाहेर पडू लागल्या. माय आणि लेक दोघींनाही आरामदायी असलेल्या त्यांच्या या झोळीचे बाहेर अमाप कौतुक होऊ लागले. त्यातून मग ‘आमच्यासाठीही बनवून देणार का?’ अशी विचारणा त्यांच्याकडे होऊ लागली. अशा रितीने मुलीबरोबरच कौशल सोवनींच्या घरात एका नव्या स्टार्टअप उद्योगाचाही जन्म झाला.

बेबी कॅरिअर अर्थात मुलांना सहजपणे वाहून नेता येणारी झोळी त्या बनवून देऊ लागल्या. खास लहान मुलांच्या कपड्यांसाठी प्रसिद्ध असलेल्या मोठमोठ्या दुकानांमध्येही मनपसंद आणि आरामदायी कपडे मिळत नाहीत, हा त्यांचा गार्गीसाठी कपडे शोधतानाचा स्वानुभव होता. पुढे परिचितांकडूनही या वस्तुस्थितीला दुजोरा देणारे अनुभव ऐकायला मिळाले. त्यातूनच मग पुढे झोळीबरोबरच लहान मुलांच्या कपड्यांच्या ऑर्डर्स त्यांच्याकडे यायला लागल्या. ‘झोळी, झबला आणि मोअर’ या नावाने लहान मुलांसाठी लागणाऱ्या इतर आवश्यक साधने निर्माण करण्याचा उद्योग त्यांनी सुरू केला.

लहान मुलांच्या आरोग्याची पूर्णपणे काळजी घेणारे, त्यांना आरामदायी वाटेल, अशा झोळ्या आणि झबल्यांची निर्मिती त्या करू लागल्या. केवळ एकमेकांनी केलेल्या शिफारशीमधून त्यांचा उद्योग वाढत गेला. कौशल सोवनी स्वत: कपड्यांचे डिझाइन्स आणि पॅटर्न पाहतात. पूर्वी कपडे शिवून उरणारे कापड अथवा जुन्या साड्यांपासून लहान मुलांचे कपडे शिवले जात. आता याबाबतीत पालक खूप जागृत झाले आहेत. मुलांचे आरोग्य जपणारे, आराम आणि आल्हाददायक वाटतील असे कपडे घेण्याकडे नागरिकांचा कल आहे. त्यांची ती गरज ‘झोळी, झबला आणि मोअर’कडून भागवली जात असल्याने दिवसेंदिवस या उद्योगाचा विस्तार होत आहे.

आपल्याकडचे अनेक ज्येष्ठ नागरिक परदेशी असलेल्या लेकी-सुनांच्या बाळंतपणात तिकडे संगोपनासाठी जातात. त्यातली काही मंडळी कौशल सोवनी यांच्याकडून आवर्जून झोळी आणि झबला घेऊन जातात. त्यामुळे कोणतीही जाहिरात न करता त्यांची उत्पादने अक्षरश: जगभरात जातात. रुग्णालयात बाळ बाळंतणीला भेटायला जाताना अथवा बारशाला भेट म्हणून देण्यासाठी उपयोगी वस्तूंचे संचही कौशल सोवनी तयार करतात. त्यात झबला, झोळीबरोबरच लंगोट, गोधड्या, दुपटी आदी वस्तू असतात. त्यात बाळाला पहिल्या दोन महिन्यांसाठी लागणारे सर्व साहित्य असते. सध्या उथळसर आणि वागऴे इस्टेट अशा दोन केंद्रातून ‘झोळी, झबला’चे काम चालते.

सुरूवातीच्या काळात कौशल सोवनी स्वत: परिचितांकडून येणाऱ्या मागणीनुसार बेबी कॅरिअर आणि झबले बनवून देत होत्या. मात्र काही महिन्यांतच उद्योगाचा पसारा वाढत गेला. आता त्यांच्याकडे नऊ कारागिर नियमितपणे त्यांच्या दोन केंद्रात काम करतात. त्यातील काहीजण वेतनावर तर काहींना कामानुसार मोबदला दिला जातो. वर्षभरात या व्यवसायातून १८ ते २० लाख रुपयांची उलाढाल होते. लहान मुलांचे कपडे शिवताना विशेष काळजी घ्यावी लागते. म्हणूनच कौशल सोवनी स्वत: कारागिरांना प्रशिक्षण देतात. उत्पादनाचा दर्जा आणि गुणवत्तेत कोणत्याही प्रकारे तडजोड केली जात नाही.