राष्ट्रवादी काँग्रेसतर्फे जिल्ह्यात कार्यक्रम

म. टा. वृत्तसेवा, वसई

राष्ट्रवादी काँग्रेस पार्टीचे राष्ट्रीय अध्यक्ष खासदार शरद पवार यांच्या ७७व्या वाढदिवसानिमित्त वसई-विरार शहर भागात राष्ट्रवादीच्या कार्यकर्त्यांकडून जिल्ह्यांमध्ये ठिकठिकाणी कार्यक्रमांचे आयोजन करण्यात आले होते. त्याशिवाय, शुक्रवारी वसईत राष्ट्रवादीच्या जनसंपर्क कार्यालयाचे उद्‍घाटन तसेच नागरिकांशी संवाद हा कार्यक्रम होणार आहे.

मंगळवारी जिल्हा परिषद शाळा, वसई पूर्व नवघर येथे वसई विधानसभा क्षेत्रातर्फे प्रोजेक्टर भेट देण्यात आला. त्याचबरोबर विरार विभागातर्फे रजपूत चॅरिटेबल ट्रस्ट वृद्धाश्रम बेगर्स होम येथील ज्येष्ठ नागरिकांसाठी स्नेहभोजनाचा कार्यक्रम करण्यात आला. या कार्यक्रमांना जिल्हाध्यक्ष गोविंदा गुंजाळकर, कार्याध्यक्ष राजाराम मुळीक, वसई विधानसभा क्षेत्र अध्यक्ष रत्नदीप बने, नालासोपारा विधानसभा क्षेत्र अध्यक्ष सचिन कदम, इतर पदाधिकारी व कार्यकर्ते उपस्थित होते. पवार यांच्या वाढदिवसानिमित्त या आठवड्यात इतर कार्यक्रमही होणार आहेत.

जनसंपर्क कार्यालय

पवार यांच्या वाढदिवसानिमित्ताने राष्ट्रवादी काँग्रेस पक्षातर्फे स्वाभिमान सप्ताह आयोजित करण्यात आला असून, त्याचा भाग म्हणून रक्तदान शिब‌िराचे आयोजन करण्यात आले आहे. यावेळी आमदार आनंद ठाकूर यांच्या जनसंपर्क कार्यालयाचे उद्‍घाटन शुक्रवार, १५ डिसेंबर रोजी सागर पार्क, बिल्डिंग क्र.२, सागरशेत पेट्रोल पंपाजवळ सकाळी १०.१० वाजता होणार आहे. वसईतील नागरिकांशी संवाद साधण्यासाठी ठाकूर या कार्यालयात वेळोवेळी उपस्थित राहणार आहेत. आनंद ठाकूर यांच्या ‘फेसबुक पेज’चे अनावरणही यावेळी होणार आहे. या संवाद कार्यक्रमास वसई तालुक्यातील नागरिकांनी उपस्थित रहावे, असे आवाहन राष्ट्रवादी काँग्रेस पार्टी वसई-विरार शहर शाखेतर्फे करण्यात आले आहे.