म. टा. वृत्तसेवा, पालघर
राष्ट्रवादी काँग्रेसचे पालघर तालुका अध्यक्ष संजय पाटील यांनी अध्यक्ष पदासह प्राथमिक सदस्यत्वचा देखील राजीनामा दिल्याने राष्ट्रवादी काँग्रेसमध्ये अंतर्गत भूकंप आला आहे. ऐन विधानसभा निवडणुकीच्या तोंडावर पाटील यांनी राजीनामा दिल्याने पक्षाला मोठा झटका बसला आहे.
राष्ट्रवादी काँग्रेसचे पालघर जिल्हाध्यक्ष सुनिल भुसारा यांच्याकडे संजय पाटील यांनी आपला राजीनामा पाठविला आहे. राष्ट्रवादी काँग्रेसच्या स्थापनेपासून संजय पाटील हे पक्षात सक्रिय होते. जिल्ह्यातील औधोगिक क्षेत्रात कामगाराच्या प्रश्नांबाबत त्यांनी वेळप्रसंगी संघर्षाची भूमिका घेऊन अनेक कामगारांचे संसार उभे करण्यात अतिशय महत्त्वाची भूमिका बजावली. पाटील यांनी पक्षात असताना निष्ठावंत म्हणून काम करून पक्ष वाढीसाठी प्रयत्न केले होते. तालुक्यातील नगरपालिकेइतका मोठा कारभार असलेल्या बोईसर ग्रामपंचायतीमध्ये त्यांनी राष्ट्रवादी काँग्रेस पक्षाला चांगली उभारी दिली होती. सलग दोन वेळा त्यांनी बोईसर ग्रामपंचायतीवर आपल्या पक्षाचा सरपंच बसविला तसेच आजूबाजूच्या ग्रामपंचायतींवरही आपल्या पक्षाचे वर्चस्व कायम ठेवले.
तालुका अध्यक्ष पदाचा भार स्वीकारल्यापासून पक्षउभारणीसाठी प्रयत्न सुरू केले होते. पालघर नगराध्यक्ष निवडणुकी पूर्वी पक्षामध्ये पडझड चालू असताना राष्ट्रवादीचा नगराध्यक्ष बसविण्यामागे त्यांचा मोठा वाटा राहिला आहे. त्यांच्या राजीनाम्यामुळे पक्षाचे मोठे नुकसान होणार असून राजकीय समीरणात बदल होण्याचीही शक्यता आहे.
सध्याचे राजकीय वातावरण पाहता राजकीय विश्वसार्हतेवरच विश्वास राहिला नाही. आता स्वाभिमानाने सामाजिक कार्यात सहभागी होऊन पुढील वाटचालीसाठी तसेच कामगार संघटनेमध्ये ठाण्याचे माजी पालकमंत्री गणेश नाईक यांच्यासोबत एकनिष्ठ राहून समाजसेवा करणार आहे. तसेच यापुढे कुठल्याही राजकीय पक्षामध्ये प्रवेश न करता, निवडणूक प्रक्रियेपासून दूर राहण्याचा निर्णय घेतला आहे.
संजय पाटील