२०२०-२१ या वर्षाचा अर्थसंकल्प स्थायी समितीला सादर
म. टा. वृत्तसेवा, नवी मुंबई
चालू आर्थिक वर्षासाठी मूळ अर्थसंकल्प सादर करताना एनएमएमटीने ३३३ कोटी २६ लाख १५ हजार जमेसह ३३३ कोटी२१ लाख ५ हजार खर्च अपेक्षित धरून ५ लाख १० हजार रुपये शिल्लक दर्शविली होती. परंतु, ९ जुलै २०१९ पासून बेस्ट उपक्रमाने प्रवासी भाडेदरात कपात करून साध्या बसचे किमान प्रवासी भाडे ५ रुपये तर जास्तीचे भाडे २० व वातानुकूलित बसचे किमान प्रवासी भाडे ६ रुपये व जास्तीत जास्त प्रवासी भाडे २६ रुपये केल्याने एनएमएमटी उपक्रमाला फटका बसला आहे. एनएमएमटीची प्रवासी संख्या २५ हजारांनी कमी झाल्याने प्रतिदिन एनएमएमटीचे ७ लाखांचे उत्पन्न कमी झाले. त्यात अवैध प्रवासी वाहतुकीमुळे व रिक्षा, ओला, उबेरच्या वाढत्या संख्येचाही फटका बसत आहे.
प्रवाशांना सेवा पुरविताना महिना साडेचार कोटी रुपये तोटा सहन करून केवळ नवी मुंबई महापालिकेच्या अनुदानावर तग धरलेल्या एनएमएमटी उपक्रमाने आर्थिक वर्ष २०२०-२१साठी ३६३ कोटी ७५ लाख २३ हजार रुपये जमेसह ३६३ कोटी ७० लाख ८ हजार खर्च अपेक्षित धरून ५ लाख १५ हजार रुपये शिलकीचा अर्थसंकल्प मंगळवारी स्थायी समितीस सादर केला. २१व्या शतकातील नगरीत राहणाऱ्या नागरिकांना वातानुकूलित सेवा देण्यावर भर देणाऱ्या एनएमएमटी उपक्रमाने आगामी वर्षात सर्व बसमध्ये सीसीटीव्ही कॅमेरे बसविणे, सर्व बसमध्ये स्मार्टकार्डचा वापर, पर्यावरणपूरक १०० इलेक्ट्रिक व ४० सीएनजी बस जीसीसी तत्त्वावर उपलब्ध करून घेणे व वाशी सेक्टर-९ येथील स्थानकासह वाशी सेक्टर-१२ येथील टर्मिनल व अन्य आगारांचा महापालिकेच्या माध्यमातून विकास करण्याचे निश्चित केल्याची माहिती एनएमएमटीचे परिवहन व्यवस्थापक शिरीष आरदवाड यांनी दिली.
सीएनजीची देयके, डिझेलचे वाढलेले दर, सुट्टे भाग खरेदी आणि आस्थापनाविषयक खर्चात झालेल्या वाढीमुळे चालू आर्थिक वर्षाचा सुधारित अर्थसंकल्प सादर करताना एनएमएमटीने २६८ कोटी २ लाख ९ हजार रुपये जमेसह २६७ कोटी ९५ लाख ७४ हजार रुपये खर्च अपेक्षित धररून ६ लाख ३५ हजार शिल्लक राहणार असल्याचे नमूद केले आहे. त्यामुळे अपेक्षित उत्पन्न (३३३ कोटी ) घसरुन एनएमएमटीची गाडी २६८ कोटी उत्पन्नावर येऊन थांबली आहे.