​ महापालिकेच्या निधीची प्रतीक्षाच

संमेलन पार पडल्यानंतरही २५ लाख मिळेना

म. टा. वृत्तसेवा, डोंबिवली

डोंबिवलीमध्ये पार पडलेल्या साहित्य संमेलनाला तीन महिने लोटल्यानंतरही साहित्य संमेलनासाठी महानगरपालिकेकडून मिळणारा निधी अद्याप मिळालेला नाही. महापालिकेकडून मंजूर करण्यात आलेल्या ५० लाखांच्या निधीपैकी केवळ २५ लाखांचा निधी आयोजक आगरी युथ फोरमला प्राप्त झाला असून शिल्लक रकमेमुळे आयोजकांचे काही व्यवहार अद्याप रखडलेले आहेत.

कल्याण डोंबिवली महानगरपालिकेच्या हद्दीमध्ये साहित्य संमेलन झाले. आगरी युथ फोरम या संमेलनाची आयोजक होते. पालिकेच्या हद्दीत साहित्याचा जागर होत असल्याने आयोजकांना आ​र्थिक बळ देण्याचे पालिकेने जाहीर केले होते. त्यासाठी ५० लाखांची तरतूद पालिकेद्वारे करण्यात आली होती. मात्र, संमेलन होऊन तीन महिने झाले तरी यापैकी केवळ २५ लाखांचाच निधी आयोजकांच्या हाती पडला आहे. उर्वरित निधी आयोजकांना अद्याप मिळालेला नाही. काही लोकप्रतिनिधींचे हा निधी आयोजकांना प्राप्त होऊ नयेत यासाठी प्रयत्न सुरू असून हा निधी थांबविण्याच्या कुरापती करण्यात येत असल्याची माहिती विश्वसनीय सूत्रांकडून मिळाली आहे. हा निधी प्राप्त करण्यासाठी आयोजकांकडून शर्थीचे प्रयत्न करण्यात येत आहेत. मात्र अद्याप त्यांना यश मिळालेले नाही.

कल्याण-डोंबिवली महानगरपालिकेला योग्य श्रेय आणि मानसन्मान न दिल्यामुळे साहित्य संमेलनाच्या वेळी महानगरपालिका आणि आगरी युथ फोरम यांच्यामध्ये काही वाद झाले होते. त्यानंतर पालकमंत्री एकनाथ शिंदेंच्याद्वारे महानगरपालिकेचा २५ लाखांचा धनादेश सुपूर्द करण्यात आला होता. मात्र उर्वरित निधी अजूनही प्रलंबित आहे. अर्थसंकल्पामध्ये आधीच तरतूद करण्यात आलेली असल्याने या निधीला विलंब होण्याचे कारण स्पष्ट होत नाही.

महामंडळाकडे हिशेब सादर

साहित्य संमेलनाचा हिशेब साहित्य महामंडळाकडे सादर करण्यात आल्याचे संमेलनाचे स्वागताध्यक्ष आणि आगरी युथ फोरमचे अध्यक्ष गुलाब वझे यांनी सांगितले. साहित्य संमेलनाच्या जमा-खर्चाचा हिशेब आणि अद्याप प्रलंबित असलेला निधी याची सर्व माहिती साहित्य महामंडळाला देण्यात आली असून महानगरपालिकेचा निधी मिळविण्यासाठी प्रयत्न सुरू असल्याचे वझे म्हणाले.