गणपती मंडळांत ‘अधिकृत’ लखलखाट?

महावितरणला केवळ ११ मंडळांत आढळली अनधिकृत जोडणी; तपासणीवर प्रश्नचिन्ह

म. टा. वृत्तसेवा, ठाणे

शहरातील सार्वजनिक गणेशोत्सव मंडळाची संख्या आणि अधिकृत वीजपुरवठा घेणाऱ्या मंडळांची संख्या पाहता बऱ्याच गणपती मंडळांनी चोरून विजेचा वापर केला असण्याची शक्यता असूनही महावितरणच्या तपासणीत केवळ ११ सार्वजनिक गणेशोत्सव मंडळांनी अनधिकृत वीजपुरवठा घेतल्याची बाब समोर आली आहे. त्यामुळे या तपासणीवरच प्रश्नचिन्ह उपस्थित होऊ लागले आहेत.

महावितरणने गणेश मंडळांना सवलतीच्या दरात वीज दिली जाते. तरीही याचा लाभ सर्व गणेश मंडळे घेत नसल्याचे दिसून येते. अनधिकृत वीजजोडणीमुळे गणेशोत्सव साजरी करताना वीजदुर्घटना होऊ शकते. त्यामुळे यावेळीही महावितरणने अधिकृतच वीजजोडणी घेण्याविषयी महावितरणने मंडळांना आवाहन केले होते. या आवाहनाला बऱ्याच मंडळांनी प्रतिसाद दिला होता. २३६ मंडळांना वीजजोडणी मंजूर करण्यात आली होती. त्यापैकी २३४ मंडळांनाजोडणी देण्यात आली. मात्र पोलिसांच्या आकडेवारीनुसार शहरात सार्वजनिक गणेशोत्सव मंडळांची संख्या ३४५ असताना १११ मंडळे चोरून विजेचा वापर करत असण्याची शक्यता आहे. अनधिकृत वीजजोडणी घेणाऱ्या मंडळांवर महावितरणचे दामिनी पथक विशेष लक्ष ठेवून होते.

गणेशोत्सवाच्या कालावधीत महावितरणने ठाण्यात सार्वजनिक गणेश मंडळांनी घेतलेल्या वीजपुरवठ्याची तपासणी केली. या तपासणीत ११ मंडळांनी अनधिकृत वीजपुरवठा घेतल्याचे समोर आले आहे. यामध्ये महावितरणच्या ठाणे एक विभागातील सहा आणि ठाणे दोनमधील ५ मंडळांचा समावेश आहे. तर ठाणे तीन आणि वागळे इस्टेटमध्ये अनधिकृत वीजपुरवठा घेणारे एक मंडळ तपासणीत आढळून आले नाही. तर मुलुंड परिसरात तीन मंडळापैकी दोन मंडळांनी अनधिकृत वीज पुरवठा घेतला असून एक मंडळाकडे विजेचा भार अधिक आढळून आला आहे. या मंडळांना वीज बिल देण्यात आले आहे. मंडळांनी बिल न भरल्यास त्यांच्यावर पुढील कारवाई केली जाईल, अशी माहिती महावितरणकडून देण्यात आली. तर भांडुप विभागात अनधिकृत वीजपुरवठा घेणारे एकही मंडळ नसल्याची बाब समोर आली आहे.