ध्वनिप्रदूषणविरोधाचा आवाज!

तक्रार निवारण यंत्रणा कार्यान्वित करून पोलिसांच्या मदतीने कारवाई

म. टा. प्रतिनिधी, ठाणे

उत्सवांच्या पार्श्वभूमीवर ठाणे महापालिका क्षेत्रात निर्माण होणाऱ्या ध्वनिप्रदूषणाला आळा घालण्यासाठी ठाणे महापालिका सक्रीय झाली असून या विरोधात तक्रारी करण्यासाठी तक्रार निवारण यंत्रणा कार्यान्वित करण्यात आली आहे. पुढील महिन्यामध्ये सुरू होणाऱ्या गणेशोत्सवादरम्यान ध्वनिप्रदूषण किंवा तात्पुरत्या स्वरूपात बांधण्यात आलेले मंडपांविरोधात नागरिकांना या कक्षामध्ये तक्रारी करता येणार असून पोलिस, वाहतूक पोलिस आणि महापालिकेचे प्रभाग अधिकारी यांच्याकडून यावर कारवाई केली जाणार असल्याचे महापालिकेने स्पष्ट केले आहे. या तक्रारी करण्यासाठी महापालिका प्रशासनाकडून व्हॅट्सअप, एसएमएस, इमेल आणि टोल फ्री क्रमांकावरून नागरिकांना तक्रार करण्यात येणार आहे. उच्च न्यायालयाकडून देण्यात आलेल्या निर्देशानंतर महापालिका प्रशासनाकडून हा कक्ष सुरू केला असून नागरिकांना यावर तक्रार करण्याचे आवाहन महापालिका प्रशासनाकडून करण्यात आले आहे.

ठाणे शहरामध्ये अतिक्रमण करून उभारले जाणारे गणेशोत्सव मंडप आणि ध्वनिप्रदूषणाविरोधात ठाणेकर जागरूक नागरिकांनी न्यायालयीन लढा उभारून या विषयी जागृकता निर्माण केली आहे. न्यायालयाने या प्रकरणी गंभीर दखल घेऊन महापालिका प्रशासन आणि पोलीस प्रशासनालाही नियमभंग टाळण्याचे सक्त आदेश दिले आहेत. त्यामुळे जाग्या झालेल्या महापालिका प्रशासनाकडून नागरिकांसाठी तक्रार करण्याच्या दृष्टीने तक्रार निवारण यंत्रणेची निर्मिती केली आहे. या कक्षामध्ये ध्वनिप्रदूषण किंवा रस्त्यावर मंडप उभारणेबाबतच्या नियमांचे उल्लंघन झाल्यास नागरिकांना तक्रारी करता येणार आहे. महापालिकेस प्राप्त तक्रारी संबंधित यंत्रणेकडे दाखल करण्यासाठी या 'तक्रार निवारण यंत्रणे'चा प्रभावीपणे वापर होऊ शकणार आहे. या माध्यमांतून येणाऱ्या तक्रारी महापालिकेच्या प्रादेशिक आपत्ती व्यवस्थापन कक्षाकडून दाखल करून घेतल्या जाणार आहेत. तसेच स्थानिक पोलिसांमार्फत, वाहतूकविषयक तक्रारींबाबत वाहतूक पोलिस शाखेकडून तर मंडपासंदर्भातील तक्रारींबाबत संबंधित प्रभाग समिती सहाय्यक आयुक्त तथा पदनिर्देशित अधिकाऱ्यांद्वारे कार्यवाही करण्यात येणार आहे. तसेच नागरिकांना याची माहिती देण्यासाठी या तक्रारींची माहिती संकेतस्थळावर प्रसिद्ध करण्यात येणार असल्याचे महापालिकेकडून स्पष्ट करण्यात आले आहे.

इथे नोंदवा तक्रार

नागरिकांना १८००-२२२-१०८ या टोल फ्री क्रमांकावर, rdmc@thanecity.gov.in या ई-मेलवर आपली तक्रार नोंदविता येणार आहे. त्याचप्रमाणे ७५०६९४६१५५ या क्रमांकावर व्हॉटसअ‍ॅप किंवा एसएमएस मार्फत तर ०२२-०२५३७१०१० या दूरध्वनीक्रमांकावर तक्रार नोंदविण्याची सुविधा महापालिकेमार्फत उपलब्ध करून देण्यात आली आहे.

कारवाईला वेग

ठाणे शहरातील रस्त्यांवर अतिक्रमण करून अनेक गणेशमूर्ती विक्रेत्यांनी मंडप टाकले असून या विरोधात महापालिकेने कारवाई सुरू केली आहे. महापालिकेकडून या मंडपांना तात्काळ हे मंडप रस्त्यावरून काढून टाकण्याच्या सूचना देण्यात आल्या आहेत. वाहतुकीला अडथळा ठरणारा कोणताही मंडप शहरात उभारू दिला जाणार नसल्याचे महापालिका प्रशासनाकडून स्पष्ट करण्यात आली आहे.