पोलिसांच्या दारू विक्रेत्यांना नोटिसा

कायदा आणि सुव्यवस्था बिघडल्यास कारवाई

म. टा. वृत्तसेवा, ठाणे

दारूच्या दुकानामधून दारू खरेदी केल्यानंतर दुकानाजवळच मद्याचे पेग रिचवले जात असल्याचे प्रकार सर्रास ठिकाणी चालू असून या गैरप्रकारावर आळा घालण्यासाठी ठाणे ग्रामीण पोलिसांनी कडक पावले उचलली आहेत. दारूच्या दुकानासमोरच ग्राहकाला मद्यपानास परवानगी देऊ नका. अन्यथा काही अनुचित प्रकार घडून कायदा आणि सुव्यवस्थेचा प्रश्न निर्माण झाल्यास कारवाई करण्यात येईल, अशा नोटिसा नवघर पोलिस ठाण्याच्या हद्दीतील दुकान मालकांना पाठवण्यात आलेल्या आहेत.

ठाणे ग्रामीण पोलिसांनी शनिवारी भाईंदर पूर्वेकडील सदानंद बिअर शॉप आणि एम. एन. बिअर शॉप या दोन दुकानांसमोर सार्वजनिक ठिकाणी शांतता भंग करणाऱ्या २९ मद्यपींवर कारवाई करण्यात आली आहे. तसेच परवान्यांचे उल्लंघन केल्याप्रकरणी या दोन्ही दुकानाच्या चालक, मालकांवर कारवाई केली आहे. इतरही दुकानांच्या चालकाकडून कोणत्याही प्रकारचे गैरकृत्य होणार नाही, याबाबतची तंबी ठाणे ग्रामीण पोलिसांनी दिली आहे. तसेच शॉपच्या येथे ग्राहकास मद्य पिण्यास बसू न देण्याबाबत किवा खाद्य पदार्थ विक्रीसाठी ठेऊ नये, अल्पवयीन मुलांना बिअरची विक्री करू नये किंवा त्यांना शॉपमध्ये प्रवेश न देण्याबाबत पोलिसांनी दुकान चालकांना १४९ प्रमाणे नोटिसा दिल्या आहेत. अटी आणि शर्तींचे उल्लंघन होणार नाही, याची काळजी घ्या अन्यथा कारवाईचा इशारा पोलिसांनी दिला आहे. ही कारवाई सहाय्यक पोलिस अधीक्षक अतुल कुलकर्णी आणि त्यांच्या टीमने केली असून या कारवाईने दुकान चालकांचे धाबे दणाणले आहेत.