गणेशोत्सव मंडळांना नोटिसा बजावणार

म. टा. वृत्तसेवा, नवी मुंबई

नवी मुंबई पोलिस आयुक्तालय क्षेत्रातील परिमंडळ १मधील २० गणेशोत्सव मंडळांना ध्वनिप्रदूषणासंदर्भात नोटिसा बजावण्यात येणार आहेत. या गणेश मंडळांनी आवाजाच्या मर्यादेचे उल्लंघन करत ध्वनिप्रदूषण केल्याचे तपासणीत निष्पन्न झाले आहे.

एकीकडे पर्यावरणभिमुख गणेशोत्सव साजरा करण्याचे आवाहन केले जात असताना दुसरीकडे गणेशोत्सव मंडळांनी ध्वनिप्रदूषण केले आहे. नवी मुंबई पोलिसांनी दहीहंडी पाठोपाठ गणेशोत्सवातील ध्वनिप्रदूषणावरही लक्ष ठेवले होते. गणेशोत्सवापूर्वीची, गणेशोत्सवादरम्यानची आवाजाची पातळी स्थानिक पोलिस ठाण्याच्या स्तरावर टिपण्यात आली होती. नवी मुंबई पोलिस आयुक्तालय क्षेत्रातील परिमंडळ १मधील १० पोलिस ठाण्यांच्या हद्दीतील २० मंडळांना नोटिसा बजावण्यात येणार आहेत. या मंडळांनी आवाजाची पातळी ओलांडल्याची नोंद करण्यात आली आहे. या मंडळांची यादी सहाय्यक पोलिस आयुक्तांकडे पाठवल्यानंतर त्यांच्याकडून मंडळांना नोटिसा बजावण्यात येणार आहेत. या नोटिसांना दोन महिन्यांत मंडळांनी उत्तर द्यायचे आहे. त्यानंतर मंडळ दोषी आढळल्यास त्यांच्यावर गुन्हा दाखल करण्यात येईल. ५ वर्षांचा कारावास आणि १ लाख रुपये दंड अथवा दोन्ही अशा शिक्षेची तरतूद आहे.