सागर ठक्करची दुबईतही कंपनी

बोगस कॉल सेंटर प्रकरण; आरोपीचे आणखी ‘उद्योग’

म. टा. वृत्तसेवा, ठाणे

बोगस कॉल सेंटरद्वारे अमेरिकन नागरिकांची फसवणूक करणाऱ्या सागर ठक्कर याने आणखी एक कंपनी दुबईत सुरू केली होती. तसेच त्याने फसवणुकीतून मिळालेले पैसे जमिनीत गुंतवले असण्याची शक्यता वरिष्ठ पोलिस अधिकाऱ्यांनी व्यक्त केली आहे.

फिनिक्स आयटी इन्फ्रास्ट्रक्चर असे या कंपनीचे नाव असून ही कंपनी दुबईत असल्याचे कळते. बोगस कॉल सेंटरची महिन्याची आर्थिक उलाढाल २ ते ३ कोटी होती. शिवाय व्यवहाराची कोणतीही नोंद ठेवली जात नव्हती. कर्मचाऱ्यांना पगारही त्यांच्या बँक खात्यात वर्ग न करता पगाराची रक्कम रोख दिली जात होती. त्यामुळे सागर अत्यंत नियोजन पद्धतीने बोगस कॉल सेंटर चालवत असल्याचे पोलिस अधिकाऱ्यांचे म्हणणे आहे. सागरच्या बँक खात्याचीही चौकशी करण्यात येत आहे. मात्र या बोगस कॉल सेंटरला नुकताच अटक केलेला रक्सेस चौकसी याला व्हाइस ऑन इंटरनेट प्रोटोकॉल सुविधा पुरवली असल्याची माहिती समोर आली आहे. या प्रकरणातील १५ आरोपी अद्याप फरार आहेत. या फसवणुकीच्या गुन्ह्यात प्रत्येक आरोपीचा सहभाग वेगवेगळा आहे.

बोगस कॉल सेंटरचे शिलाँग कनेक्शन समोर येत आहे. शिलाँगमध्ये ट्रेनिंग सेंटर चालवले जात होते, असेही वरिष्ठ पोलिस अधिकाऱ्यांचे म्हणणे आहे. शिवाय, फसवणूक झालेल्या अमेरिकन नागरिकांकडून लेखी म्हणणे घेतले जाणार असल्याचेही सांगितले. जेणेकरून याचा वापर पुरावा म्हणून केला जाणार आहे. आतापर्यंत १० ते १२ अमेरिकनांच्या तक्रारी आल्याचेही अधिकारी सांगतात. आरोपीविरुद्ध पुरावे जमा केले जात आहेत.