बायोगॅसला विरोधच!

पालिका आपल्या भूमिकेवर ठाम; वाद चिघळण्याची शक्यता

म. टा. वृत्तसेवा, डोंबिवली

डोंबिवली पश्चिमेकडील बायोगॅस प्लाण्टच्या स्थापनेचा वाद चिघळण्याची चिन्हे सध्या दिसून येत आहेत. पांडुरंग टॉवर्सने या प्रकल्पाला विरोध केल्यानंतर आता या भागातील २२ इमारतींनी या प्रकल्पाला हरकत घेतली असून प्रकल्पाचे काम थांबवण्याची मागणी केली आहे.

डोंबिवलीतील गणेशनगर भागामध्ये रामनवमीच्या निमित्ताने अलीकडेच बायोगॅस प्रकल्पाचे भूमिपूजन करून काम सुरू करण्यात आले. मात्र या जागेच्या आजूबाजूला अरूंद रस्ता आहे. त्याचबरोबर हा परिसर सोसायट्यांनी वेढलेला आहे. त्यामुळे त्या इमारतींना कचऱ्याचा त्रास होण्याची शक्यता असून या प्रकल्पाला इमारतींचा आक्षेप आहे. मात्र महानगरपालिका आपल्या म्हणण्यावर ठाम असून प्रकल्पाचा फलकसुद्धा पालिकेकडून प्रदर्शित करण्यात आलेला आहे.

महानगरपालिका अधिकाऱ्यांची भेट घेऊन याबद्दल त्यांनी निषेध नोंदवला असला तरीही प्रकल्प पूर्ण करण्याच्या भूमिकेत पालिका आहे. त्यामुळे आपल्या म्हणण्यावर दोन्ही पक्ष ठाम असल्याने वाद चिघळ्याची शक्यता आहे. नागरिकांच्या हरकती विचारात न घेता प्रकल्पाचे नियोजन कसे केले, असा प्रश्न स्थानिक रहिवासी उपस्थित करत आहेत. त्याचबरोबर उद्यानाचे आरक्षण असलेल्या जागेत हा प्रकल्प सुरू करण्यात आल्याने त्यालाही आक्षेप घेण्यात आला आहे.

पालिका देणार प्रेझेंटेशन

याबद्दल इमारतींनी एकत्र येऊन पालिकेला निवेदन सादर केल्यानंतरही महानगरपालिका आपल्या म्हणण्यावर ठाम आहे. महानगरपालिका अधिकारी प्रकल्पाचे प्रेझेंटेशन सादर करणार असून नागरिकांची मनधरणी करण्याचा त्यांचा प्रयत्न आहे.

तर आंदोलन करणार

रहिवाशांचे म्हणणे महानगरपालिका ऐकत नसेल, तर आता आंदोलन करण्याचा पवित्रा सामान्यांनी घेतला आहे. या भागात लोकवस्ती असताना तेथे प्रकल्प उभारणे चुकीचे आहे. त्यामुळे सर्व इमारतींतील रहिवासी रस्त्यावर उतरू, असा इशारा रहिवासी मंगल सुर्वे यांनी दिला आहे.