स्थायी समिती सभापती दिपेश म्हात्रे यांचे आदेश
म. टा. वृत्तसेवा, कल्याण
आर्थिक कोंडीत सापडलेल्या कल्याण-डोंबिवली महापालिकेचा थकलेल्या मालमत्ता करवसुलीचा आढावा घेताना स्थायी समिती सभापती दिपेश म्हात्रे यांनी मोठ्या थकबाकीदारांची थकबाकी वसूल होईपर्यंत त्यांचे इतर प्रकल्पदेखील रोखून धरण्याचे आदेश दिले. स्थायी समितीने यंदाच्या अर्थसंकल्पात प्रशासनाला दिलेल्या ४७० कोटींच्या उद्दिष्टाचा पाठलाग करताना प्रशासनाकडून वसुलीसाठी कोणत्या उपाययोजना केल्या जात आहेत, याचा आढावा घेण्यासाठी बुधवारी स्थायी समितीच्या वतीने विशेष बैठकीचे आयोजन करण्यात आले होते.
या बैठकीनंतर पत्रकारांना माहिती देताना सभापती म्हात्रे यांनी मागील वर्षी मालमत्ता कराची ९० टक्के वसुली करण्यात आली असून यंदा प्रशासनाला ४७० कोटींचे उद्दिष्ट देण्यात आले. यंदादेखील ९० ते ९५ टक्के वसुली अपेक्षित आहे, मात्र वसुलीला वेग देण्यासाठी व्यावसायिक मालमत्ता, मोकळ्या भूखंडावरील कर तसेच चेक बाउन्सधारकांवर नजर ठेवली जाणार आहे. आतापर्यंत १,२०० व्यावसायिक मालमत्ता सील करण्यात आल्या. २५०० थकबाकीदारांना नोटिसा देण्यात आल्या आहेत. तर मोकळ्या भूखंडावरील कराच्या ३८० कोटींच्या थकबाकीपैकी १३० कोटी वादग्रस्त असल्या तरी १७० कोटी रुपयांच्या वसुलीचे उद्दिष्ट असून आतापर्यंत यातील २० कोटींची वसुली झाली आहे. चेक बाउन्सप्रकरणी ४०० जणांवर गुन्हे दाखल करण्यात आले आहेत. तर वादग्रस्त करआकारणीबाबत महासभेत चर्चा करून मार्ग काढला जाणार आहे. यंदा जास्तीत जास्त वसुलीचे उद्दिष्ट ठेवण्यात आल्याचे म्हात्रे यांनी सांगितले. नागरिकांना मालमत्ता कराची बिले मेसेजद्वारे पाइवण्याचा निर्णयदेखील घेण्यात आला असून जास्तीत जास्त वसुली करणाऱ्या अधिकाऱ्यांना प्रोत्साहन भत्ता दिला जाणार असल्याचे ते म्हणाले.