दशरथ चौरे यांचे निधन

पालघर ः डहाणू तालुक्यातील धानिवरी येथील जिल्हा परिषदेच्या शाळेचे मुख्याध्यापक दशरथ शिनवार चौरे (५१) यांचे नुकतेच वापी येथील रुग्णालयात निधन झाले. ८ फेब्रुवारी रोजी चारोटीजवळ एका कारची धडक बसून ते गंभीर जखमी झाले होते. तेव्हापासून त्यांच्यावर उपचार सुरू होते. मात्र त्यांची मृत्यूशी चाललेली झुंज १५ फेब्रुवारी रोजी संपुष्टात आली.

या घटनेने परिसरात शोककळा पसरली आहे. दशरथ चौरे यांच्या निधनामुळे जिल्ह्यातील दुर्गम आदिवासी भागातील शाळाबाह्य मुलांना जिल्हा परिषदेच्या प्राथमिक शाळेत दाखल करण्यासाठी जीवाचे रान करणारा शिक्षक हरपल्याची भावना व्यक्त होत आहे. सेवाभावी आणि लढवय्या स्वभावाच्या चौरे यांनी आपल्या शाळेकरीता सरकारी योजनांसह इतर सेवाभावी संस्थांच्या आणि खासगी कंपन्यांच्या सीएसआर फंडातून अनेक प्रकल्प राबविले.