पालघर मॉब लिंचिंग: कोठडीतील आरोपीला करोना

मटा वृत्तसेवा, वाडा: पालघरमधील डहाणू तालुक्यातील गडचिंचले येथील हत्याकांड प्रकरणातील एका आरोपीला करोनाचा संसर्ग झाल्याची माहिती मिळाली आहे. हा आरोपी वाडा पोलीस ठाण्याच्या कोठडीत आहे. वाडा तालुक्यात आतापर्यंत करोनाचा एकही रुग्ण नव्हता. मात्र, आता पोलीस कोठडीतील आरोपीला करोनाची लागण झाल्यानं तालुक्यात चिंतेचं वातावरण आहे.

पालघर जिल्ह्यातील गडचिंचले गावात जमावाकडून तिघांची हत्या झाली होती. या प्रकरणात शंभराहून अधिक संशयित आरोपींना अटक करण्यात आली आहे. त्यातील २३ आरोपी हे वाडा येथील पोलीस ठाण्यात अटकेत आहेत. काही आरोपींची वैद्यकीय तपासणी केली असता, त्यातील एका आरोपीला करोनाचा संसर्ग झाल्याची माहिती मिळाली आहे. त्याला तातडीनं पालघर ग्रामीण रुग्णालयात उपचारासाठी दाखल करण्यात आले आहे.

वाडा तालुका अद्याप करोनापासून कोसो दूर होता. मात्र, आता एका आरोपीला करोनाची लागण झाल्यानं चिंता वाढली आहे. दरम्यान, आरोपीच्या संपर्कात आलेल्या अनेकांना आता तपासणीसाठी नेले जाणार असल्याची माहिती असून, याबाबत अधिकाऱ्यांची बैठक सुरू आहे.

करोना Live: औरंगाबादेत २३ नव्या रुग्णांची नोंद

नाशिकमध्ये चिंता वाढली! जिल्ह्यात आढळले २४ नवे रुग्ण