पालघरच्या पोलिसाने श्रीलंकेत फडकविला तिरंगा

म. टा. वृत्तसेवा, वसई

श्रीलंका येथे पार पडलेल्या आंतरराष्ट्रीय कराटे चॅम्पियनशिपमध्ये उत्तम कामगिरी करत पालघर पोलिस दलातील रितेश प्रजापती यांनी भारताचा तिरंगा फडकविला आहे. प्रजापती यांनी चार प्रकारच्या स्पर्धांमधून चार सुवर्णपदके आपल्या नावे केली आहेत.

पालघर पोलिस दलातील पोलिस मुख्यालय पालघर येथे नेमणुकीत असलेले शिपाई रितेश दिनेश प्रजापती यांनी श्रीलंका येथे पार पडलेल्या १७व्या टेनशिप कप आंतरराष्ट्रीय कराटे चॅम्पियन शिप २०१९मध्ये सहभाग घेतला होता. या स्पर्धेत भारताचे प्रतिनिधित्व करत फर्स्ट मेन ओपन काता, फर्स्ट मेन ओपन कुमितो, फर्स्ट मेन ओपन टीम काता आणि फर्स्ट मेन ओपन टीम कुमितो या चार प्रकारच्या स्पर्धांमधून चार सुवर्णपदकाची कमाई केली आहे.

प्रजापती यांनी पोलिस कर्तव्यात कोणतीही कसर न करता दिवसातून पाच ते सहा तास सराव व डायट करून हे यश संपादन केले आहे. यासाठी त्यांना पालघरच्या पोलिस अधीक्षकांनीही मार्गदर्शन करून प्रोत्साहन दिले या कमगिरीसाठी पोलिस अधीक्षक गौरव सिंग यांनी पालघर पोलिस दलातर्फे त्यांचे अभिनंदन केले.