प्रसुतीच्या वेदना सोसत शहापूरमधून निघून सिव्हिल रुग्णालयात पोहोचलेली महिला आणि केवळ कर्मचाऱ्यांच्या संपामुळे उपचारास मिळालेला नकार हा धक्कादायक प्रकार ठाण्यात उघडकीस आला. संपांचा चटका रुग्णांना किती तीव्र प्रमाणात बसतो याचे प्रत्यक्ष उदाहरण दिसून आले. सातव्या वेतन आयोगाच्या हट्टापायी दोन दिवसांपासून सरकारी कर्मचाऱ्यांनी काम बंद करत आंदोलनाचे अस्त्र उगारले असून त्यांच्या मागण्यांसाठी हा लढा असला तरी आपल्या वर्तवणुकीचा फटका निरपराधांना बसत आहे का, याचा मात्र विचार कर्मचाऱ्यांकडून केला गेलेला नाही. विशेषतः आरोग्य व्यवस्थेतील कर्मचारीही आंदोलनात सहभागी झाले असल्याने या दोन दिवसांत रुग्णालयाकडे येणाऱ्या रुग्णांचा चांगलाच खोळंबा झाला. प्रसुतीसारखी नैसर्गिक घटना, अथवा ज्येष्ठ नागरिकाला जाणवणाऱ्या वेदना यांना कोणत्याही कारणास्तव रोखणे शक्य नाही. डॉक्टर या संपात सहभागी नसले तरी त्यांना सहकार्य करणारे कर्मचारी मात्र सेवेवर रुजू नसल्याने उपचार होणार नसल्याचे सिव्हिल रुग्णालयात जाहीर करण्यात आले. प्राथमिक आरोग्य केंद्रांवरही हीच परिस्थिती होती. या परिस्थितीतून मार्ग काढण्यासाठी कंत्राटी कामगारांची मदत घेतली गेली असली तरीही रुग्णांचा झालेला खोळंबा गंभीर प्रकारचाच होता. या सगळ्यांत कुणीही जीव गमावलेला नसला तरी एकूणच रुग्णांच्या सेवेची झालेली हेळसांड मात्र गंभीरच आहे. स्वतःच्या हक्कांसाठी भांडणे हा प्रत्येकाचाच हक्क आहे, मात्र तसे करताना सामान्यांचाही विचार व्हायलाच हवा.
रुग्णसेवेची अक्षम्य हेळसांड
प्रसुतीच्या वेदना सोसत शहापूरमधून निघून सिव्हिल रुग्णालयात पोहोचलेली महिला आणि केवळ कर्मचाऱ्यांच्या संपामुळे उपचारास मिळालेला नकार हा धक्कादायक ...
Maharashtra Times 10 Aug 2018, 4:00 am