गळ्याला चाकू लावून धमकी, प्रतिकार करण्याचा महिलांचा प्रयत्न
म. टा. वृत्तसेवा, ठाणे
पहाटेच्या वेळी प्रात:विधीसाठी निघालेल्या एका महिलेच्या गळ्याला चाकू लावून चोरट्याने महिलेच्या गळ्यातील मंगळसूत्र खेचल्याची धक्कादायक घटना वागळे इस्टेटमधील हनुमाननगरमध्ये घडली आहे. आरोपीचा आणखी एका महिलेच्या गळ्यातील मंगळसूत्र खेचण्याचा डाव होता. यावेळी दोघी महिलांनी चोरट्याचा प्रतिकार करण्याचा प्रयत्न केला. मात्र चोरटा हिसका देऊन पळून गेला असून श्रीनगर पोलिस ठाण्यात गुन्हा दाखल करण्यात आला आहे.
हनुमाननगरमध्ये राहणाऱ्या २५ आणि २६ वर्षाच्या दोन महिला सोमवारी पहाटे साडेपाच वाजण्याच्या सुमारास प्रात:विधीसाठी येथील सार्वजनिक सुलभ शौचालयात निघाल्या होत्या. येथील गल्लीतून जात असताना अचानक एक व्यक्ती समोर आला. शर्टाच्या आत लपवलेला चाकू बाहेर कडून येथील एका महिलेच्या गळ्याला लावला. तर दुसऱ्या महिलेच्या डोक्याचे केस पकडले. गळ्यातील मंगळसूत्र काढून देण्याची मागणी केली. दोघींनी मंगळसूत्र देण्यास नकार दिला. याच राग आल्याने त्याने महिलांना धमकी दिली. यावेळी महिलांनी या चोरट्याला प्रतिकार करण्याचा प्रयत्न केला. मात्र त्याने गळ्याला जोराचा हिसका देऊन यातील एका महिलेच्या गळ्यातील मंगळसूत्र चोरले. माझ्याविरुद्ध पोलिस ठाण्यात तक्रार दिल्यास तुम्हाला सोडणार अशी धमकीही देत आरोपी अंधाराचा फायदा घेऊन पळून गेला. आरोपी हा गुंड प्रवृतीचा असल्याने महिलांनी घटनेच्या दिवशी पोलिस ठाण्यात तक्रार दिली नव्हती. मात्र नंतर दुसऱ्या दिवशी दिलेल्या तक्रारीनंतर राहुल राजू सौदा रा. वाल्मिकी पाडा याच्याविरुद्ध गुन्हा दाखल करण्यात आला आहे.