घनश्याम हत्येप्रकरणी पप्पू कलानी निर्दोष

म. टा. वृत्तसेवा, उल्हासनगर

सन १९९०मध्ये भाजपचे नेते घनश्याम बठीजा यांच्या झालेल्या हत्येप्रकरणी पप्पू कलानी आण‌ि अन्य सात आरोपींची कल्याण सत्र न्यायालयाने शनिवारी निर्दोष मुक्तता केली. घनश्याम यांचे लहान भाऊ ‌इंदर बठीजा यांच्या हत्येप्रकरणी पप्पू कलानी सध्या जन्मठेपेची शिक्षा भोगत आहेत.

२७ फेब्रुवारी १९९० रोजी विधानसभा निवडणुकीच्या वेळी बोगस मतदानावरून भाजपनेते घनश्याम बठीजा आण‌ि पप्पू कलानी यांच्यात झालेल्या वादानंतर घनश्याम यांचा गोळीबारात मृत्यू झाला होता. या हत्येप्रकरणी घनश्याम यांचे भाऊ इंदर यांनी पप्पू कलानी, डॉ. नरेंद्र रामसिंघानी, बाबा गॅब्रियल, बच्ची पांडे, श्याम किशोर गरीकापट्टी, हर्षद शेख आणि रिचर्डसन यांच्या विरोधात गुन्हा दाखल केला होता. मागील अनेक वर्षांपासून सुरू असलेल्या या खटल्याच्या अंतिम सुनावणीत कल्याण सत्र न्यायालयाचे न्यायाधीश डी. एस. हातरोटे यांनी पप्पू कलानीसह सात आरोपींची निर्दोष मुक्तता केली, अशी माहिती पप्पू कलानी यांचे वकील भोजराज जेसवानी यांनी दिली. या प्रकरणात आरोपींची बाजू मुंबईचे वकील हर्षद पोंडा यांनी मांडली. याबाबत, घनश्याम बठीजा यांचे बंधू कमल बठीजा यांच्याशी संपर्क साधण्याचा प्रयत्न केला असता तो होऊ शकला नाही. सध्या पप्पू कलानी मुलीच्या लग्नासाठी १७ दिवसांच्या पॅरोलवर आहेत.