महाड: एसटी बस जळून खाक, प्रवासी सुखरूप

महाड: मुंबई-गोवा महामार्गावर महाज जवळील वडपाले गावाजवळ गणेशभक्तांना घेऊन जाणाऱ्या एका एसटी बसला लागलेल्या आगीत ही बस जळून खाक झाली आहे. आज सकाळी सात वाजण्याच्या सुमारास ही दुर्घटना घडली. सुदैवाने वेळीच सर्व गणेश भक्ताना बाहेर काढल्यामुळे मोठा अनर्थ होण्याचे टळले. ही एसटी बस परळहून रत्नागिरीतील सावर्डे येथे जात होती. आगीचे नेमके कारण मात्र अद्याप अस्पष्ट आहे.

गणेशभक्तांचे सर्व सामान जळून खाक

गणेशोत्सवासाठी कोकणात चाललेल्या गणेशभक्तांनी आपल्या सोबत घेतलेले महत्त्वाचे सामान या आगीत जळून खाक झाले आहे.


या दुर्घटनेनंतर मुंबई-गोवा महामार्गावर पेण ते माणगावदरम्यान दोन्ही बाजूची मोठी वाहतूक कोंडी झाली. मात्र काही काळाने खोळंबलेली वाहने धीम्या गतीने सुरू झाली आहेत.