पार्किंग पर्यायांची पाहणी

ठाणे रेल्वे स्थानक परिसरासाठी चाचपणी; आयुक्तांचा पाहणी दौरा

म. टा. विशेष प्रतिनिधी, ठाणे

ठाणे रेल्वे स्थानक परिसरातील वाहतुकीला शिस्त लावण्याचे पालिकेचे प्रयत्न यशस्वी होत असले तरी प्रवाशांच्या वाहनांसाठी पुरेसे पार्किंग उपलब्ध नसल्याने ठाणेकरांचे हाल होत आहेत. ते दूर करण्यासाठी पालिका आयुक्त संजीव जयस्वाल यांनी सोमवारी या भागाचा पाहणी दौरा केला. गावदेवी मैदानातील भुयारी वाहनतळ तातडीने मार्गी लावण्यासोबत गावदेवी उद्यानातही भुयारी वाहनतळ सुरू करता येईल का, याची चाचपणी करा. तसेच गावदेवी मैदान येथे सायंकांळी ६ ते १० या वेळेत तात्पुरती पार्किंग व्यवस्था करता येईल का, ही शक्यताही पडताळून पाहण्याच्या सूचना आयुक्तांनी दिल्या आहेत.

सोमवारी सकाळपासून जवळपास पाच तास जयस्वाल यांनी विविध प्रकल्पांची, रस्त्यांची, पारसिक चौपाटी आणि स्थानक परिसराचा पाहणी दौरा केला. त्यावेळी त्यांनी या सूचना दिल्या. अतिरिक्त आयुक्त सुनील चव्हाण, वाहतूक शाखेचे पोलिस उपायुक्त अमित काळे आणि महापालिकेचे अधिकारी उपस्थित होते

ठाणे स्थानक परिसरातील वाहतूककोंडी, फेरीवाले आणि मुजोर रिक्षाचालकांमुळे ठाणेकर प्रवाशांचे प्रचंड हाल होत होते. मनसेच्या आंदोलनानंतर या भागातील फेरिवाले हद्दपार झाले आहेत. तर पालिकेने रिक्षा, खासगी वाहनांसाठी स्वतंत्र मार्गिका तयार केली आहे. त्याशिवाय प्लॅटफॉर्म क्रमाक दोन समोरच्या रस्त्यांवर वाहनांना प्रतिबंध करण्यात आला आहे. ही व्यवस्था टिकवून ठेवण्यासाठी आयुक्त संजीव जयस्वाल यांनी पालिकेचे १० सुरक्षारक्षकही स्थानक परिसरात तैनात केले आहेत. त्यामुळे रिक्षांच्या रांगांना शिस्त लागली असून प्रवाशांना मोठा दिलासा मिळाला आहे. तसेच, स्टेशन समोरचा परिसरही सुटसुटीत झाला आहे. मात्र, ठाणे स्थानकापर्यंत आपल्या खासगी वाहनाने विशेषतः मोटासरायकलने येणाऱ्या प्रवाशांना वाहने पार्क करण्यासाठी पुरेशी जागा उपलब्ध नाही. त्यामुळे रस्त्यांवर, एसटी स्थानक आणि रेल्वे स्थानक परिसरातही अस्ताव्यस्त वाहने पार्क केली जातात. त्याना पार्किंग व्यवस्था उपलब्ध करून देण्यासाठी पालिकेने प्रयत्न सुरू केला आहे.

गावदेवी मैदान येथे भुयारी पार्किंगचा प्रस्ताव अंतिम टप्प्यात असून ते काम लवकर सुरू करण्याच्या सूचना आयुक्तांनी दिल्या. संध्याकाळच्या वेळेत मैदानात कोणतेही खेळ खेळले जात नाहीत. त्या कालावधीत तात्पुरत्या स्वरूपातील पार्किंग सुरू करता येईल का, याचाही विचार सुरू झाला आहे. तसेच, मैदानाशेजारी असलेल्या उद्यान परिसरातही भुयारी पार्किंगचीही चाचपणी केली जाणार आहे.


पारसिक चौपाटीचे स्वप्न जूनपर्यंत पूर्ण

ठाणे शहराच्या वैभवात ऐतिहासिक भर घालणाऱ्या पारसिक चौपाटी प्रकल्पाचे काम युद्धपातळीवर सुरू असून येत्या जूनअखेरपर्यंत ठाणेकरांचे चौपाटीचे पूर्ण होणार आहे. तशा सूचना आयुक्तांनी दिल्या आहेत. तर, पोखरण रोड नं. ३, टिकुजिनी वाडी, ग्लॅडी अल्वारीस मार्ग, गांधीनगर चौक, पोखरण रोड नं. २ या रस्त्यांची कामे डिसेंबर अखेरपर्यंत पूर्ण करण्याचे आदेशही यावेळी देण्यात आले. गांधीनगर ते शिवाईनगर चौकपर्यंत सुरू असलेल्या सायकल ट्रॅकच्या कामाची पाहणीही यावेळी करण्यात आली असून ते काम तातडीने पूर्ण करण्यासोबतच व्होल्टास कंपनी येथील नाल्यावरील पुलाची रूंदी वाढवण्याचा प्रस्ताव सादर करण्याच्या सूचनाही यावेळी देण्यात आल्या.