स्मार्ट सिटी प्रकल्पांतर्गत 'सॉफ्ट मोबिलीटी प्लॅन'च्या कामास गती
म. टा. प्रतिनिधी, ठाणे
ठाणे रेल्वे स्थानक परिसर शहरातील सर्वाधिक गर्दीचा भाग असून या भागातून रहिवासी, नोकरदार मोठ्या संख्येने ये-जा करत असल्याने त्यांच्या सोयीसाठी या भागाचा कायापालट करण्याचा प्रयत्न स्मार्ट सिटी प्रकल्पाअंतर्गत करण्यात आला आहे. सॉफ्ट मोबिलीटी प्लॅन अंतर्गत या भागाची सुधारणा करून पादचाऱ्यांच्या दृष्टीने विविध सोयीसुविधा उपलब्ध करून देण्यात येणार आहेत. यामध्ये फुटपाथचे रुंदीकरण, विद्युत दिवे बसवणे, पदपथांचे सुशोभिकरण, ज्येष्ठ नागरिकांसाठी बैठकव्यवस्था, फुटपाथ लॅण्ड स्कॅपिंग अशा कामांचे नियोजन आहे. ही कामे सुरू करण्यात आली असून त्यासाठी या भागातील वाहतूकव्यवस्था बदलण्यात आली आहे.
ठाणे स्थानक परिसरातील १२.८७१ किमी लांबीचे रस्ते निवडून त्या ठिकामी सॉफ्ट मोबिलिटी प्रकल्प राबविण्याचे नियोजन ठाणे महापालिकेकडून करण्यात आले आहे. यामध्ये पदपथांची सुधारणा, मार्गदर्शन फलके, मार्गिका, झेब्रा क्रॉसिंग, सायकल स्टॅण्ड, बस स्टॉप या कामांव्यतिरिक्त पादचाऱ्यांना आवश्यक सर्व सुविधा पुरविण्याचे निश्चित करण्यात आले आहे. या प्रकल्पामुळे पादचाऱ्यांना सुरळीत व सुरक्षित प्रवासासाठी मदत करण्यात येणार आहे. ठाणे महापालिकेच्या २०१९-२०च्या अर्थसंकल्पामध्ये या प्रकल्पासाठी सुमारे २३ कोटी रुपयांचा खर्च निश्चित करण्यात आला होता. याशिवाय पाच किमी लांबीच्या रस्त्यांवरही महापालिकेच्या निधीतून अशीच योजना राबविण्याचे निश्चित करण्यात आले होते. याच अंतर्गत हा प्रकल्प सुरू करण्यात आला असून सॅटिसखालील भागामध्ये पादचाऱ्यांच्या सोयीचे नियोजन करण्यात येत आहे. ठाणे स्टेशन रोड परिसर, गिरनार चहा डेपो, आलोक हॉटेल आणि मॅकडोनाल्ड या परिसरात ही योजना कार्यान्वित करण्याचे निश्चित झाले आहे. त्यासाठी या परिसरात कामामुळे सध्याच्या वाहतूक व्यवस्थेला फटका बसू नये, यासाठी ठाणे वाहतूक शाखेच्या वतीने येथील वाहतूक व्यवस्थेत बदल करण्याचे निश्चित केले आहे.
पोलिस उपायुक्त अमित काळे यांनी या संदर्भातील अधिसूचना काढली असून गोखले रोडवरून येणाऱ्या सर्व वाहनांना गावदेवी मंदिर चौकात प्रवेश बंद केला आहे. या सर्व वाहनांना गोखले रोडवरून गावदेवी रिक्षा स्टॅण्ड येथून डावीकडे वळून गावदेवी मैदान, पंजाब नॅशनल बँक चौक, हॉटेल शिवसागरमार्गे वळवण्यात आले आहे. तर, ठाणे रेल्वे स्थानकामधून बाहेर जाणारी वाहने गिरनार चहा, कृष्णा स्वीट्स या दुकानांच्या समोरून आलोक हॉटेलच्या समोरून डाव्या बाजूने न जाता हॉटेलच्या समोरून टर्न घेऊन गावदेवी रिक्षा स्टॅण्ड समोरून गोखले रोडमार्गे पुढे जाऊ शकणार आहे, असे वाहतूक पोलिसांनी स्पष्ट केले आहे. ही सूचना पुढील महिनाभरासाठी लागू करण्यात येणार आहे. त्यावर येणाऱ्या हरकती, सूचना आणि तक्रारींचा विचार करून त्यानुसार पुढील नियोजन पोलिसांकडून केले जाणार आहे. अत्यावश्यक सेवांच्या वाहनांसाठी मात्र ही अधिसूचना लागू राहणार नसल्याचे पोलिसांनी स्पष्ट केले आहे.