अपंगांना पेन्शन धनादेशाचे वाटप

म. टा. वृत्तसेवा, वसई

वसई-विरार पालिकेच्या अपंग कल्याण विभागतर्फे ६० वर्षांवरील ज्येष्ठ अपंग व्यक्तींना महाराष्ट्र दिनाचे औचित्य साधून पेन्शन धनादेशांचे वाटप करण्यात आले. या योजनेचा अधिकाधिक अपंग बांधवांनी लाभ घेण्याचे आवाहन करण्यात आले असून अपंग बांधवांनी पालिकेच्या अपंग कल्याण विभागाशी संपर्क साधावा, असे सांगण्यात आले.

६० वर्षांवरील ज्येष्ठ अपंगांना कायमस्वरुपी प्रतिमाह दोन हजार इतके अनुदान देण्याचा ठराव पालिका महासभेत गेल्यावर्षी मंजूर करण्यात आला होता. त्यानुसार अशा ६३ व्यक्तींना ६ महिन्याचे दोन हजारांप्रमाणे अनुदान देण्यात आले. यासाठी पालिकेने एकुण ७ लाख ५६ हजार रुपये खर्च केले आहेत. ज्येष्ठ अपंगांना प्रति महिना दोन हजार रुपये, असे सहा महिन्याचे प्रत्येकी बारा हजार रुपये अनुदान वाटप करण्यात आले.

अपंगांना पालिकेकडून विविध योजनांचा लाभ देण्यात येणार आहे, असे या कार्यक्रमात सांगण्यात आले.

अपंग व्यक्तींना रोजगाराची उपलब्धता व्हावी यासाठी फेरीवाला झोनमध्ये अपंग व्यक्तींना जागा उपलब्ध करून देणे, बाजार वसुलीचे ठेके हे अपंग व्यक्तींसाठी राखीव ठेवणे, अपंगांसाठी व अपंगांच्या शिक्षण तसेच शासनाच्या योजना पोहोचविण्यासाठी मेळाव्याचे आयोजन केले जाणार आहे. व्यावहारिक दृष्ट्या सक्षम असणाऱ्या अपंग व्यक्तींना स्वयंरोजगारासाठी ५० हजारांपर्यंत अनुदान योजना, अपंग व्यक्तींसाठी प्रशिक्षण देणाऱ्या संस्थांना अनुदान, अपंग व्यक्तींचे भारतीय आयुर्विमा महामंडळामार्फत जीवन विमा उतरविणे, अशी कामे पालिकेकडून करण्याचा ठरावही मंजूर झाला आहे. आता ही उर्वरित कामे पालिकेकडून होण्याची प्रतीक्षा अपंग बांधव करीत आहेत.

या कार्यक्रमाला पालिकेचे आयुक्त सतीश लोखंडे, महापौर प्रविणा ठाकूर,उपायुक्त अजीज शेख, स्वीकृत नगरसेवक अजीव पाटील व प्रफुल्ल साने व इतर मान्यवर उपस्थित होते.