म. टा. वृत्तसेवा, ठाणे
महापालिकेने घोडबंदर रोड परिसरात अद्ययावत उभारलेल्या ट्रॅफिक पार्क चालक चाचणीसाठी उत्तम असल्याने याठिकाणी तशी परवानगी मिळावी, याकरिता ठाणे आरटीओने पालिकेकडे केलेल्या मागणीला सकारात्मक प्रतिसाद दिला आहे. आता प्रत्यक्षात परवानगी कधी मिळणार, याकडे आरटीओ अधिकाऱ्यांचे लक्ष लागले आहे.
शालेय विद्यार्थ्यांना वाहतुकीच्या नियमांची माहिती व्हावी, तसेच नियम कसे पाळावे, याची माहिती व्हावी, यासाठी घोडबंदर रोडवरील कावेसर येथे दोन एकरमध्ये चिल्ड्रन ट्रॅफिक पार्क उभारण्यात आले आहे. याठिकाणी दुचाकी आणि चारचाकी गाड्यांचे प्रशिक्षण देण्याची सोय असून एक हजार चौरस फुट जागेत व्हर्च्युअल प्रशिक्षण कक्षाचीदेखील उभारणी करण्यात आली आहे. यामध्ये विद्यार्थ्यांना ऑडिओ-व्हीडिओच्या माध्यमातून चारचाकी वाहन चालवण्याचे प्रशिक्षण घेता येणार आहे. या पार्कचे २९ ऑगस्ट रोजी युवासेना प्रमुख आदित्य ठाकरे यांच्या हस्ते मोठ्या थाटामाटात उद्घाटन करण्यात आले होते. मात्र या पार्कमध्ये तुम्हाला काही करायचे का, अशी विचारणा पालिका प्रशासनाने ठाणे आरटीओसह वाहतूक शाखेकडे केली होती. त्यानंतर आरटीओने पार्कमध्ये दुचाकी आणि चारचाकी चालकांची चाचणी घेण्याबाबत परवानगी मिळावी, असा प्रस्ताव पालिका प्रशासनाकडे ठेवला होता.
चालक चाचणीसाठी हे पार्क उत्तम असल्याचे आरटीओ अधिकाऱ्यांचे म्हणणे आहे. यासाठी प्रशासन तयार असल्याचे अधिकाऱ्याने सांगितले. मात्र अद्याप परवानगी मिळालेली नाही. याबाबत पालिकेच्या एका अधिकाऱ्याला विचारले असता, आरटीओचा प्रस्ताव आला असून लवकारत लवकर परवानगी देण्याबाबत कार्यवाही पूर्ण केली जाईल, असे त्याने सांगितले. शंभर टक्के परवानगी मिळणार असून आरटीओदेखील परवानगीदेण्याबाबत सकारात्मक असल्याचे हा अधिकारी म्हणाला.