सात बँक खाती, एक छदामही नाही

फिनिक्स फसवणूक प्रकरण

म. टा. वृत्तसेवा, ठाणे

गुंतवणूकदारांना कोट्यवधी रुपायांचा गंडा घालणाऱ्या फिनिक्स रेलकॉन प्रा. लिमिटेड कंपनीसह आरोपी चंद्रकांत इंगवले याची एकूण सात बँकखाती आहेत. मात्र बँक खात्यात काहीच पैसे नसल्याची बाब ठाणे आर्थिक गुन्हे शाखेच्या चौकशीत समोर आली आहे. सुमारे ३०० गुंतवणूकदारांची फसवणूक झाल्याची शक्यता पोलिस अधिकारी व्यक्त करत आहेत.

सप्टेंबरमध्ये गुंतवणूकदारांची ४ कोटी ४५ लाख रुपयांची फसवणूक केल्याप्रकरणी कंपनीच्या अध्यक्षांसह इतरांविरुद्ध नौपाडा पोलिस ठाण्यात गुन्हा दाखल करण्यात आला होता. आरोपी चंद्रकांत इंगवले हा फरारी आहे. गुंतवणुकीच्या रकमेवर अवघ्या काही वर्षांत दुप्पट रक्कम देण्याचे आमिष कंपनीतर्फे दाखवण्यात आले होते. फसवणूक झालेले बहुतांश भिवंडीतील लूम कारखान्यात काम करणारे कामगार असल्याचे चौकशीत समोर आले आहे. ठाणे आर्थिक गुन्हे शाखा या गुन्ह्याचा तपास करत असून आरोपींची बँक खात्याविषयीही माहिती घेण्यात आली. फिनिक्स कंपनीच्या नावाने आयसीआयसीआय आणि एसबीआयमध्ये दोन बँकखाती आहेत. तर, उर्वरित पाच बँक खाती इंगवले याच्या नावाने आहेत. ही बँक खाती गोठवण्यात आली आहेत. या खात्यातून गुंतवणूकदारांना पैसे दिले असल्याच्या नोंदी पोलिसांना सापडल्या आहेत. मात्र या खात्यात काहीच पैसे नाहीत, अशी माहिती आर्थिक गुन्हे शाखेतील एका अधिकाऱ्याने दिली. यातील काही खाती काही वर्षे सुरूच नसल्याचे या अधिकाऱ्यांचे म्हणणे आहे.

आरोपीची गावी जमीन असल्याचेही समजते. फसवणूक झालेल्या गुंतवणूकदारांनी आर्थिक गुन्हे शाखेशी संपर्क साधावा, असे आवाहन आर्थिक गुन्हे शाखेकडून करण्यात आले आहे. आरोपींना लवकरच अटक केली जाईल, असेही अधिकारी सांगतात.