ख्रिस्ती सामूहिक विवाहसोहळा उत्साहात
म. टा. वृत्तसेवा, वसई
वसईतील ख्रिस्ती मच्छिमार तरुण-तरुणींचा सामूहिक विवाह सोहळा कोळीवाड्यातील संत पीटर चर्चमध्ये हजारोंच्या उपस्थितीत पार पडला. या वेळी ४० तरुण जोडपी लग्नाच्या बंधनात अडकली.
वसई तालुक्यातील बहुतेक कोळीवाड्यांत सामुदायिक लग्नसोहळे साजरे केले जातात. उत्तन, उत्तनपाली, चौक, वसई, अर्नाळा आणि मनोरी या ठिकाणी चर्चमध्ये दरवर्षी फेब्रुवारी महिन्यात तेथील ख्रिश्चन मच्छिमारांचे सामुदायिक विवाहसोहळे पार पडतात. त्यातील एक कोळीवाडा म्हणजे वसई कोळीवाडा! या ठिकाणचा सामूहिक लग्नसोहळा नुकताच उत्साहात पार पडला.
ऑगस्ट ते डिसेंबरपर्यंतच्या काळात मासेमारी केल्यानंतर बोटींचे आर्थिक हिशेब होतात. त्यानंतर दोन पैसे खिशात आल्यानंतर वेध लागतात ते फेब्रुवारी महिन्यातील सामुदायिक लग्नसोहळ्याचे. हा सोहळा उत्साहात पार पडतो. यंदाही वसई कोळीवाड्यातील ख्रिस्ती मच्छिमारांचा सामूहिक विवाहसोहळा नुकताच पार पडला. यावेळी ४० जोडपी विवाहबद्ध झाली. विवाहसोहळ्यानंतर चर्च ते पाचूबंदर या एक किलोमीटर रस्त्याच्या दुतर्फा वधुवरांना पाहण्यासाठी लहानथोरांची गर्दी उसळली होती.
मच्छिमार समाजात ख्रिस्ती विवाहेच्छुक तरुण-तरुणींची जूनअखेरपर्यंत चर्चमध्ये नोंदणी केली जाते. त्यानंतर प्रबोधनास सुरुवात होते. वधुवरांच्या सभा घेतल्या जातात. त्यांच्या पालकांच्याही सभा घेतल्या जातात. वैवाहिक जीवन म्हणजे काय, वैवाहिक जीवनाच्या जबाबदाऱ्या, जबाबदार पालकत्व, मुलांची जडणघडण, कौटुंबिक समस्या, लैंगिक जीवन, विवाहसंस्थेचे पावित्र्य, प्रेम आणि विवाह अशा विविध विषयांवर त्यांचे प्रबोधन केले जाते.
...
एचआयव्ही चाचणी, विवाहपूर्व मार्गदर्शनही
लग्नाआधी एचआयव्ही चाचणी सक्तीची असते. विवाहपूर्व आरोग्य मार्गदर्शन शिबीर आयोजित केले जाते. त्यानंतर चर्चमध्ये नियोजित वधुवरांचे लग्नाचे अर्ज भरून घेतले जातात, असे स्थानिक मच्छिमार बांधवांनी सांगितले.