अखेर सीए संस्थेला भूखंड

म. टा. वृत्तसेवा, डोंबिवली

अनेक महिन्यांपासून रखडलेला आयसीएआय संस्थेच्या जागेचा प्रश्न अखेर निकाली निघाला आहे. केडीएमसीने शैक्षणिक उद्देशासाठी आरक्षित असलेला चिकणघर येथील १७०० चौरस मीटरचा भूखंड चार्टर्ड अकाउंट संस्थेला दिला आहे. या जागेवर ही संस्था सहा मजली इमारत बांधणार आहे.

इन्स्टिट्यूट ऑफ चार्टर्ड अकाउंट ऑफ इंडिया या संस्थेच्या कल्याण-डोंबिवली शाखेची स्थापना २०१६मध्ये झाली. या संस्थेचे अध्यक्ष मदन आचवल यांनी महापालिका प्रशासनाकडे शैक्षणिक उपक्रमासाठी जागा मिळावी, अशी मागणी केली होती. महापालिकेने या संस्थेला चिकणघर येथील १७०० चौरस मीटर जागा देण्याचा ठराव मंगळवारी झालेल्या महासभेत मंजूर केला. आचवल यांनी सांगितले की, चिकणघर येथील जागेत सहा मजली इमारत उभारली जाणार आहे. त्याचा उपयोग विद्यार्थ्यांना होईल. इमारत बांधण्यासाठी साडेतीन कोटी रुपये खर्च अपेक्षित आहे. तसेच भूखंडापोटी महापालिकेस तीन कोटींचा प्रीमिअम भरावा लागणार आहे. डोंबिवली, कल्याण आणि त्यापलीकडच्या विद्यार्थ्यांना सुविधा देण्यासाठी सीए संस्थेला भूखंड देण्यात आलेला आहे. या जागेचा वापर करून स्थानिक विद्यार्थ्यांसाठी अभ्यासिका त्याचबरोबर परीक्षेच्या इतर सुविधा या केंद्राच्या माध्यमातून देण्यात येणार आहेत. त्यामुळे विद्यार्थ्यांना फायदा होणार आहे. भाजप नगरसेवक राहुल दामले आणि मनसेचे मंदार हळबे यांनी यासाठी पाठपुरावा केला होता. या इमारतीद्वारे कल्याणमधूनच आयसीएआयचे व्यवहार चालविण्यात येणार आहेत. त्यामुळे विद्यार्थ्यांचा नक्कीच फायदा होणार आहे.